Amakuru ku muti ushobora kuvura uburwayi bwa COVID-19 akomeje gusimburana umunsi ku wundi, ari nako abahanga bakora ijoro n’amanywa bashaka kureba ko bahagarika impfu ziterwa n’iki cyorezo zikomeje kwisukiranya.

Magingo aya, abantu barenga ibihumbi 300 bamaze kwandura iki cyorezo mu mpande zitandukanye z’Isi, mu gihe hafi ibihumbi 13 bo bamaze gupfa, hakaba hari ubwoba ko ahubwo iminsi mibi iri imbere ku buryo mu gihe hataboneka umuti, abapfa bakomeza kuba benshi.

Nta muti uravumburwa ushobora kwifashishwa mu kuvura icyorezo cya Coronavirus, ahubwo icyo abaganga bakora muri iki gihe ni ukuvura ibimenyetso byayo.

Ni ukuvuga ngo niba umuntu afite umuriro, abaganga bamuha imiti ishobora guhosha wa muriro cyangwa ahandi yaba ari kubabara. Nta muti n’umwe uraboneka nk’uko urwara malariya ukajya kwa muganga bakaguha Coartem nyuma y’iminsi itatu ukaba wongeye kuba mutaraga.

Kuba nta muti uraboneka magingo, bituma abantu bavuga byinshi, ibitekerezo ku miti ishobora kwifashishwa bikisukiranya.

Perezida wa Leta Zunze Ubumwe za Amerika, Donald Trump, yavuze ko abahanga barimo guhuza imiti ibiri ya Hydroxychloroquine na Azithromycin, kandi igiye gutanga umusanzu mu kuvura indwara ya Coronavirus ikomeje kwibasira Isi.

Yavuze ko Ikigo gishinzwe kugenzura ibijyanye n’imiti n’ibiribwa, US FDA, cyemeje ikoreshwa ry’imiti yombi mu kuvura abanduye Coronavirus, mu buryo bw’igenzura.

Trump yanditse kuri Twitter ati “Hydroxychloroquine na Azithromycin, bishyizwe hamwe, bifite amahirwe menshi guhindura ibintu mu mateka y’ubuvuzi. FDA igeze kure – Murakoze! Ndizera ko yombi (H ikora neza iri kumwe na A) ihita itangira gukoreshwa. Abantu barimo gupfa, mwihute kandi Imana ihe umugisha buri wese.”

Uwitwa Banamwana Hoffman Prince yifashishije urukuta rwa Twitter, maze abaza Minisiteri y’Ubuzima niba ari byo koko ko iyo miti isanzwe ivura malariya yaba ivura COVID-19.

Minisante yamusubije ko kugeza ubu “Hari amakuru akomeje kwemeza ko Chloroquine yifashishwaga mu kuvura malariya ishobora kuvura uburwayi bwa COVID-19. Icyakora ntabwo OMS iremeza ku mugaragaro ko chloroquine ari umuti wemewe wa COVID19”.

Hari hashize iminsi Urwego rushinzwe Ubuzima mu Bushinwa rutangaje ko umuti uzwi ku izina rya Favipiravir ufite ubushobozi bwo gukiza icyorezo cya Coronavirus.

Uyu muti usanzwe ukoreshwa mu kuvura ibicurane by’ubwoko butandukanye, watangiye gukoreshwa mu buryo bwemewe n’amategeko mu 2014.

Umuyobozi w’Ikigo cy’Igihugu Gishinzwe Guteza Imbere Ikoranabuhanga mu Butabire mu Bushinwa (China National Center for Biotechnology Development), Zhang Xinmin, yavuze ko mu miti yose bakoreyeho ubushakashatsi, basanze nta wundi muti urusha ubushobozi Favipiravir.

Mu kiganiro n’itangazamakuru kuwa Kabiri, tariki ya 17 Werurwe 2020, Zhang Xinmin, yavuze ko mu barwayi basaga 80 bari bafashwe na COVID-19, bakoreweho igerageza mu bitaro bya Shenzhen, mu Ntara ya Guangdong; 35 bahabwaga ibinini bya Favipiravir bakize vuba kurusha abandi 45 bitaweho mu buryo busanzwe bwo kuvura ibimenyetso bya COVID-19.

Ubu bushakashatsi bwanagaragaje ko abageragerejweho uyu muti bakiraga mu minsi iri hagati y’umunani na 10.

Ubundi bushakashatsi bwakorewe mu bitaro bya Zhongnan bya Kaminuza ya Wuhan na bwo bwagaragaje ko ubushobozi bwo gukiza COVID-19 hifashishijwe Favipiravir ari bwo bwiza kurusha uburyo bwari busanzwe bukoreshwa.

Favipiravir (T-705) yavumburiwe bwa mbere mu gihugu cy’u Buyapani. Abakoze uyu muti bashakaga guhangana na virus zitera ibicurane bifata abantu byo mu bwoko bwa A na B.

Kuba nta muti wa Coronavirus uraboneka kugeza ubu, ubwoba bukomeje gutuma abantu bavuga byinshi