Abashakashatsi bo muri Kaminuza ya Cambridge mu Bwongereza batangaje ko bakoresheje ikoranabuhanga ry’ubwenge bukorano, AI, mu gukora ubwoko bushya bw’urukingo rushobora gufasha mu guhangana n’amoko menshi ya virusi, by’umwihariko Coronavirus.

Aba bashakashatsi bavuga ko ari ubwa mbere igice cy’ingenzi cy’urukingo gitegurwa mu buryo bwuzuye na AI, hanyuma urwo rukingo rukageragerezwa ku bantu.

Urwo rukingo rwateguriwe gufasha umubiri kumenya no kurwanya amoko yose ya coronavirus, harimo ubwoko butandukanye bwa Covid-19 n’izindi virusi zishobora kuba ziri mu nyamaswa ariko zikaba zishobora kuzanduza abantu mu gihe kizaza, zigateza icyorezo gishya.

Nubwo ubu bushakashatsi bukiri mu ntangiriro, abahanga bavuga ko bushobora guhindura uburyo Isi yitegura ibyorezo. Itsinda ryakoze ubu bushakashatsi, ryamaze no gutangira gukora ku nkingo zishobora guhangana n’ibicurane, H5N1 izwi nk’ibicurane by’inyoni na Ebola.

Ubusanzwe, inkingo zikorwa hashingiwe ku bwoko bwa virusi busanzwe buzwi. Ariko ikibazo ni uko virusi nyinshi zihindura imiterere yazo vuba, bigatuma urukingo rwari rwakozwe ruhita rusaza cyangwa rukenera kuvugururwa. Ni yo mpamvu inkingo za Covid-19 n’iz’ibicurane zidakunze kumara igihe kirekire zitavuguruwe.

Prof Jonathan Heeney wo muri Kaminuza ya Cambridge yavuze ko abashakashatsi bahora basa n’abiruka inyuma ya virusi, aho kuyitega mbere. Yavuze ko intego yabo ari ugukora inkingo zishobora gutegura umubiri mbere y’uko icyorezo gishya kigera ku bantu.

Mu gukora uru rukingo, abashakashatsi bafashe amakuru y’uturemangingo twa virusi zitandukanye zo mu bwoko bwa coronavirus yari yarakusanyijwe mu bikorwa byo kugenzura no gushakisha virusi zishobora guteza ibyorezo.

Ayo makuru yashyizwe muri AI, irayasesengura, maze ikora icyo abashakashatsi bise “super-antigène”. Icyo ni igice cy’ingenzi cy’urukingo gitoza ubwirinzi bw’umubiri kumenya no kurwanya umuryango mugari wa virusi, kabone n’iyo zahindura imiterere cyangwa hakaboneka indi virusi nshya iva mu nyamaswa ikajya mu bantu.

Antigène ni cyo gice cy’urukingo cyigisha ubwirinzi bw’umubiri icyo bugomba kurwanya. Iyo umubiri umaze kucyiga, ugira ubushobozi bwo kumenya virusi mu gihe izawinjiyemo no kuyirwanya vuba.

Uru rukingo rwamaze kugeragerezwa ku bantu 39, mu igerageza ryari rigamije kureba niba rudateza ingaruka ku buzima. Hari gutegurwa irindi gerageza rizitabirwa n’abantu bagera kuri 200, rikazafasha kumenya neza uburyo urukingo rutoza ubwirinzi bw’umubiri.

Ni bwo bwa mbere mu mateka y'Isi hakozwe urukingo hifashishijwe AI