Ibitaro byigenga (MBC Hospital) byatangiye gutanga serivisi z’ubuvuzi zigezweho mu Karere ka Nyarugenge muri uku kwezi.

Ibi bitaro biherereye mu Murenge wa Nyarugenge ahahoze Grace Hotel, haruguru y’isoko ryo mu Biryogo, bikaba byaratangiye gukora ku itariki 16 Mutarama 2018.

Mu kiganiro IGIHE yagiranye n’Umuyobozi Mukuru wa MBC Hospital, Dr. Basabose Jean Paul, yavuze ko bitanga serivisi zirimo kwakira abarwayi b’indembe, ubuvuzi bw’abana, ubw’indwara zo mu mubiri, ubuvuzi bw’indwara z’ababyeyi n’abakeneye kubagwa.

Dr Basabose kandi yanavuze ko bakira abafite indwara zo mu kanwa n’amenyo, abakeneye ubugororangingo, gupima ibizamini, gucisha abarwayi mu cyuma, kwakira abarwayi bashyirwa mu bitaro, kureba mu gifu n’indwara z’amara n’izindi.

Yavuze ko intego y’ibitaro ari ugutanga serivisi nziza ndetse zigezweho kandi ko bazabigeraho bitewe n’uko bafite inzobere z’abaganga kuri buri serivisi batanga.

Dr Basabose yakomeje agira ati “Umwihariko wacu ni ukwakira neza abatugana, bakabona serivisi bifuza zifite ireme kandi bakazibonera ku gihe. Icya mbere tuzirinda ni uko hari umurwayi wamara igihe kirekire ategereje guhabwa serivisi. Azabona abamwakira akihagera kandi ahabwe serivisi nziza inoze kuko tubfitiye inzobere.”

Ku bijyanye n’ubushobozi bw’ibitaro, Dr Basabose yavuze ko bifite ubushobozi bwo kwakira umubare uwo ari wo wose w’abarwayi babigana bivuza bataha, ibyumba byo kubagiramo birenga bine, ibitanda bisaga 70 byo kwakiriraho abivuza badataha.

Ibitaro bya MBC biherereye mu Biryogo mu Karere ka Nyarugenge

Ibitaro bifite ibyumba bihagije byo kwakira ababigana

Ibitaro bya MBC byatangiye gukora ku wa 16 Mutarama 2018. Byatangaga serivisi zitandukanye

Ibitaro bya MBC bikora amasaha yose

Ibi bitaro bikorera ahahoze Grace Hotel

MBC Hospital bikorera ku muhanda ugana mu Biryogo ku isoko

MBC ifite inzobere zo muri Laboratoire n'ahandi

Radiography y'ibitaro bya MBC

Imashini yifashishwa mu kuvura indwara z'amenyo

Ecography y'Ibitaro bya MBC

Endoscopy Ibitaro bya MBC bikoresha

Serivisi ibitaro bitanga

Umuyobozi Mukuru wa MBC Hospital, Dr. Basabose Jean Paul, yavuze ko bitanga serivisi nziza kandi zihuse