Urukiko rw’Ibanze rwa Kicukiro rwategetse ko Ntihanabayo Samuel washinze Ingufu Gin Ltd na Prof Emile Bienvenu uyobora Rwanda FDA n’abandi 11 bakoraga muri iki kigo bafungwa iminsi 30 y’agateganyo.

Uyu mwanzuro wafashwe ku gicamunsi cyo ku wa 3 Nzeri 2026. Umucamanza yasobanuye ko hari impamvu zikomeye zituma abakurikiranyweho ibyaha byo gukora, gucuruza, gukwirakwiza cyangwa kwinjiza mu gihugu ibinyobwa bitujuje ubuziranenge.

Abakozi ba Rwanda FDA bakurikiranyweho ibyaha birimo gukoresha ububasha bahabwa mu nyungu zabo bwite, kwirengagiza ibiteganywa n’itegeko n’ibindi.

Umucamanza yagaragaje ko urukiko rwasanze nta mpamvu zikomeye zituma Oluwatosin Ayayi, ushinzwe ibikorwa by’uruganda rwa Kerry Taste and Nutrition Rwanda akekwaho kwinjiza no gukwirakwiza ibinyobwa bitujuje ubuziranenge mu gihugu.

Urukiko kandi rwagaragaje ko Uwamahoro Elizabeth na Ndayishima Rwabukumba Patrick bakora mu Kigo cya FDA barekurwa kubera ko nta mpamvu zikomeye zigaragaza ko bakoresheje ububasha bwabo mu nyungu zabo bwite.

Muri rusange urukiko rwategetse ko Ntihanabayo Samuel, Twahirwa Fulgence, Katushabe Donias, Kayihura Mudahogora Benitha, Hakizimana Hamuduni Alpha Peter, Mahoro Christian, Muhimpundu Alice, Nyamwasa Innocent, Nyirimigabo Eric, Nzeyimana Janiver, Niyigena Claudine, Kangabe Benitha na Prof Emile Bienvenu bakurikiranwa bafunzwe by’agateganyo iminsi 30.

Uru rubanza ruri muri dosiye y’abantu 80 barimo abakekwaho gukora inzoga zitujuje ubuziranenge cyane cyane izizwi nk’ibyuma batawe muri yombi mu ntangiro za Kanama 2026, gusa ababanje kuburanishwa ni 16.

Iburanisha ry’abo bantu 16 ryabaye ku matariki ya 25 na 26 Kanama 2026 aho abaregwa n’ababunganira baburananye bagaragaza impamvu bashingiraho basaba ko bakurikiranwa badafunze.

By’umwihariko nka Kazungu wa Ingufu Gin yaburanye abwira urukiko ko ari umushoramari, ko icyo yakoze ari ugushyiraho inzego zitandukanye mu ruganda zishinzwe gukurikirana ko ibikorwa bikorwa neza kandi byujuje ubuziranenge.

Yagaragaje ko niba haragaragaye amakosa, akwiriye kubazwa abari babishinzwe kuko ari bo bari babifitiye ububasha ndetse yabwiye Urukiko rw’Ibanze rwa Kicukiro ko yemera gutanga ingwate ya miliyari 1,9 Frw kugira ngo afungurwe by’agateganyo.

Prof. Emile we FDA na we yaburanye avuga ibyo ashijwa birimo kuba yarasinye ku cyangombwa cyahawe uruganda rwa Nyirangarama ashingiye ku mwanzuro w’akanama ka Rwanda FDA kemeje ko rwujuje ibisabwa byose, bityo ko ibyo yakoze bitanyuranyije n’amategeko.

Yaboneyeho gusaba gukurikiranwa adafunzwe kugira ngo ajye gufasha Leta gukomeza gukurikirana ibikorwa bya FDA byo gufunga inganda zitujuje ubuziranenge ndetse n’abandi bireguye mu buryo bunyuranye basaba kurekurwa ari byo bizafatwaho umwanzuro.

Oluwatosin Ayayi, we yavuze ko arengana kubera yatawe muri yombi ubwo yazaga mu Rwanda kureba ikibazo cyabayeho cyatumye uruganda rwa Kerry Taste and Nutrition Rwanda rufungwa.

Uyu mugabo yabwiye urukiko ko akwiriye gufungurwa kubera ko ibyo Ubushinjacyaha bwamuregaga ntaho yari ahuriye nabyo byo kugira uruhare rwo gucuruza, gukwirakwiza ibinyobwa bitujuje ubuziranenge mu gihugu.

Yavuze ko adasanzwe aba mu Rwanda kuko atuye muri Kenya ndetse akaba ariho afite umuryango ndetse ko wamubuze kuko ari we uwutunze.

Urukiko rwategetse ko abakozi ba Rwanda FDA barimo n'umuyobozi wabo bafungwa iminsi 30 y'agateganyo