Urukiko Rukuru rwa Kigali rwategetse ko Kalisa Adolphe uzwi nka Camarade wabaye Umunyamabanga Mukuru w’Ishyirahamwe ry’Umupira w’Amaguru mu Rwanda, akomeza gufungwa by’agateganyo nubwo yamaze kwishyura ingano y’amafaranga aregwa kunyereza.

Kalisa yari yatanze ikirego mu Rukiko Rwisumbuye asaba ko yafungurwa by’agateganyo kuko afite ikibazo cy’uburwayi bw’umugongo, impyiko n’umutima ndetse akaba yaramaze gusubiza amafaranga aregwa kunyereza.

Urukiko rwabiteye utwatsi rugaragaza ko icyo kirego nta shingiro gifite, rwemeza ko akomeza gufungwa by’agateganyo.

Camarade utarishimiye imikirize y’urwo rubanza yahise ajurira mu Rukiko Rukuru, arusaba ko yafungurwa by’agateganyo.

Icyemezo cy’Urukiko cyasomwe kuri uyu wa 30 Kamena 2026, Urukiko rwemeje ko ubujurire bwa Kalisa Adolphe ku kirego gisaba gufungurwa by’agateganyo budafite ishingiro.

Rwemeje ko icyemezo cy’Urukiko Rwisumbuye rwa Nyarugenge kidahindutse, rushimangira ko akomeza gufungwa by’agateganyo mu gihe ategereje kuburanishwa mu mizi.

Camarade yasabye ko yarekurwa by’agateganyo mbere y’urubanza mu mizi ruteganyijwe muri Nzeri 2026 kubera ko afite ibibazo by’umugongo yari afite mbere y’uko afungwa.

Yagaragarije Urukiko Rukuru ko atarafungwa yari yaratangiye kwivuriza muri Algeria bityo gufungwa bitamworohereza kwitabwaho cyane ko atemererwa n’igororero kuba yakoresha ubwishingizi bwe yivuza.

Yerekanye ko hari imbogamizi ahura na zo zishingiye ku gutinda kubona ubuvuzi no kubonana na muganga nubwo igororero rivuga ko riba rigomba kubavuza.

Yavuze kandi ko afite ibibazo by’uburwayi bw’impyiko n’umutima ashobora kuba yaragize nyuma y’uko afunzwe, agasaba gufungurwa by’agateganyo kugira ngo abashe kwivuza uko bikwiye.

Indi mpamvu yerekanye ni uko ibihumbi 21$ yaregwaga kunyereza yamaze kuyasubiza, akazikurikiranira abo yari yahaye akazi avuga ko ari bo baba baramuriganyije.

Umushinjacyaha bwemeye ko Kalisa afite uburwayi koko ariko ko Igororero ryagiye rigaragaza ko rimuvuza nk’uko biteganywa n’itegeko.

Yavuze ko uregwa atafungurwa by’agateganyo kuko igororero rimuvuza ahubwo ryashyiramo imbaraga kugira ngo rimufashe ku buryo byajya bikorwa vuba.

Yasobanuye ko atari ihame ko umuntu urwaye yafungurwa by’agateganyo akajya kwivuriza hanze y’Igororero.

Ku bijyanye n’ibyo gusubiza amafaranga yari yaranyerejwe, Umushinjacyaha yemeye ko Camarade yibwirije akishyura 21.387$ ajya kuri konti ya FERWAFA.

Yayishyuye ku wa 17 Werurwe 2026.

Umushinjacyaha ariko yavuze ko nubwo Kalisa yibwirije akishyura ayo mafaranga, bidakuraho uburyozwacyaha cyane ko mu bihano ashobora guhanishwa harimo n’ihazabu yikubye inshuro nyinshi ayo yanyereje.

Camarade akurikiranyweho ibyaha bibiri birimo icyo kunyereza umutungo n’icyaha cyo guhimba, guhindura cyangwa gukoresha inyandiko mpimbano.

Urubanza mu mizi ruteganyijwe muri Nzeri 2026, mu Rukiko Rwisumbuye rwa Nyarugenge.

Urukiko rwashimangiye ko Camarade wamaze kwishyura FERWAFA akomeza gufungwa by’agateganyo