Urukiko rw’Ubujurire rwa Paris mu Bufaransa rwimuriye ubujurire bw’umwanditsi akaba n’ubushakashatsi ukomoka muri Cameroun, Charles Onana, mu mwaka utaha.

Onana yari gutangira ubujurire ku byaha yahamijwe byo guhakana no gupfobya Jenoside yakorewe Abatutsi mu 1994, ku wa 2 Nzeri 2026 ariko we n’abanyamategeko be ntibari biteguye.

Uyu mwanditsi n’abanyamategeko be babwiye Urukiko rw’Ubujurire ko ubwanditsi bwarwo bwakoze ikosa mu nyandiko itumiza ababuranyi, bibangamira imyiteguro yabo yo kuburana.

Urukiko rw’Ubujurire rwahaye agaciro inzitizi za Onana, rwemeranya na we ko hakozwe ikosa mu gutumiza ababuranyi, rwimurira urubanza tariki ya 2 n’iya 3 Kamena 2027.

Umwe mu banyamategeko bunganira imiryango yatanze ikirego, Me Richard Gisagara, yasobanuye ko bisanzwe ko ubwanditsi bw’inkiko bukora amakosa mu gutumiza ababuranyi, urubanza rugasubikwa.

Me Gisagara yagize ati “Ntabwo bijya bibura ko amakosa abaho. Ako gakosa rero iyo kabayeho, gatuma urubanza rwimurwa. Ni ibintu bisanzwe, bibaho kenshi.”

Uyu munyamategeko yasobanuye ko hazashyirwaho indi tariki yo gutegura uru rubanza muri Werurwe 2027.

Ku wa 9 Ukuboza 2024 ni bwo Urukiko rw’i Paris rwahamije Onana ibyaha byo guhakana no gupfobya Jenoside.

Ni ibyaha ashinjwa gukora abinyujije mu gitabo yasohoye tariki ya 30 Ukwakira 2019, gifite umutwe ugira uti “Rwanda, la vérité sur l’Opération Turquoise: Quand les archives parlent”.

Urubanza rwa Onana rwatangiye tariki 7 Ukwakira 2024, rumara iminsi ine. Rwashingiye ku kirego cyatanzwe n’imiryango itatu: CPCR, Survie na IBUKA France. Uyu mushakashatsi yagaragazaga ko nta mugambi wa Jenoside yakorewe Abatutsi wabayeho.

Ibibazo by’ingenzi byabajijwe muri uru rubanza ni icyo Opération Turquoise yakozwe n’ingabo z’u Bufaransa yari igamije no kuba harabaye umugambi wa Jenoside yakorewe Abatutsi cyangwa se niba utarabaye.

Onana yavuze ko atigeze ahakana Jenoside, ariko akagaragaza isano y’aya mateka n’ihanurwa ry’indege ya Habyarimana Juvénal. Kuri Opération Turquoise, ngo ingabo za RPA Inkotanyi zanze ko ikorwa nk’uko u Bufaransa bwari bwarabiteguye.

Uyu mwanditsi yifashishije abatangabuhamya barimo Gen (Rtd) Jean-Claude Lafourcade wayoboye Opération Turquoise, Johan Swinenn wabaye Ambasaderi w’u Bubiligi mu Rwanda na Christian Quesnot wabaye Umuyobozi w’Ibiro bya François Mitterand wayoboye u Bufaransa.

Uru rukiko rwategetse Onana kwishyura ihazabu y’Amayero 7400 mu minsi itarenze 120. Damien Serieyx wakosoye iki gitabo na we yaciwe ihazabu y’Amayero 5000.

Onana na Serieyx kandi bategetswe guha indishyi y’ibihumbi 11 by’Amayero imiryango itandukanye yatanze ikirego, arimo 1000 ya IBUKA France, 2000 ya LICRA, 2000 ya CRF, 2000 ya CPCR, 2000 ya Survie, 1000 ya FIDH na 1000 ya LDH.

Mu 2024, Charles Onana yahamijwe ibyaha byo guhakana no gupfobya Jenoside ariko yarajuriye