Ubushinjacyaha bwagaragaje ko Ingabire Umuhoza Victoire washinze ishyaka DALFA Umurinzi ritemerewe gukorera mu Rwanda akekwaho kuzimiza bamwe mu bayoboke be akavuga ko bishwe.

Ibi byagaragarijwe mu Rukiko Rukuru rwa Kigali kuri uyu wa 22 Nzeri 2026, aho Ingabire n’abandi icyenda bareganwa bari bakomeje kuburanishwa ibyaha bifitanye isano n’umugambi wo gukuraho ubutegetsi bw’u Rwanda.

Umushinjacyaha yagaragaje ko Ingabire n’abo bakorana bavuze ko abantu bicwa mu Rwanda, batanga urugero rw’umuhanzi Kizito Mihigo byemejwe ko yiyahuriye muri kasho yari afungiwemo.

Yasobanuye ko hari inyandiko yafatiwe muri mudasobwa ya Ingabire, ivuga ko mu bishwe harimo Mucyo Jean de Dieu wabaye Umusenateri, Umuganga Dr. Munyandamutsa Naason, Umupolisi Rukabu Camarade, Ambasaderi Bihozagara Jacques, kandi ibyabishe bizwi.

Umushinjacyaha yavuze ko Ingabire n’abo bareganwa bavuze ko Ntirutwa Théophile na Abayisenga Venant bari abayoboke ba DALFA Umurinzi bishwe, nyamara nta kimenyetso cyigeze cyerekanwa kigaragaza ko bishwe.

Yavuze ko ubwo Ubugenzacyaha n’Ubushinjacyaha bwabazaga Ingabire, yavuze ko hari abayoboke be bagiye bicwa, ariko ko ahubwo ari we ukekwaho uruhare mu rupfu rwabo cyangwa kubazimiza.

Ati “Ingabire agenda abazwa mu Bushinjacyaha no mu Bugenzacyaha, yagiye avuga ko bari abantu be bagiye bicwa ariko kugeza uyu munsi iperereza riracyakomeje kuko ni we ubwe bikekwa ko hari abantu yaba yaragizemo uruhare. Ikirego kiracyari mu iperereza, ntiraregerwa urukiko.”

Umushinjacyaha yabwiye urukiko ko hari abantu baburiwe irengero, bikekwa ko byagizwemo uruhare, bamwe muri bo akaba yaragiye abohereza mu bihugu by’amahanga, bagakomeza kuvugana na we bategura uko bahirika ubutegetsi.

Ingabire ashinjwa kubeshya ko hari abayoboke be bishwe ariko hari ibimenyetso bigaragaza ko bakiriho. Hatanzwe urugero rwa Gasengayire Leonille uri mu bakurikiye uru rubanza.

Umushinjacyaha ati “Hari n’abandi yagiye avuga ko bapfuye, ko bishwe na Leta y’u Rwanda kandi bariho…Avuga Gasengayire Leonille, ubanza ahubwo ari hano, ni umwe mu bantu bahora bagendana na Ingabire.”

Ubushinjacyaha bwagaragaje ko mudasobwa ya Ingabire Victoire yafatiwemo inyandiko igaragaza abantu avuga ko bishwe kandi barazize urupfu rusanzwe