Minisitiri w’intebe, Dr Pierre Damien Habumuremyi yatangaje ko agiye kuvuganira umugore uhinga ibihumyo, kubera igihombo aherutse guhura nacyo ubwo ibiro 750 by’ibihumyo byamuboreragaho kubera kubura ubushobozi bwo kubibitunganya no kubigeza ku isoko.
Minisitiri w’Inebe yabitangaje ubwo yasuraga kuri uyu wa kane ku itariki ya 11 Ukwakira, umuhinzi w’ibihumyo witwa Niyibaho Berthilde, ukorera mu Karere ka Gasabo, Umurenge wa Jabana.
Niyibaho yatakambiye Minisitiri w’Intebe (…)

Minisitiri w’intebe, Dr Pierre Damien Habumuremyi yatangaje ko agiye kuvuganira umugore uhinga ibihumyo, kubera igihombo aherutse guhura nacyo ubwo ibiro 750 by’ibihumyo byamuboreragaho kubera kubura ubushobozi bwo kubibitunganya no kubigeza ku isoko.

Minisitiri w’Inebe yabitangaje ubwo yasuraga kuri uyu wa kane ku itariki ya 11 Ukwakira, umuhinzi w’ibihumyo witwa Niyibaho Berthilde, ukorera mu Karere ka Gasabo, Umurenge wa Jabana.

umuhinzi w’ibihumyo, Niyibaho Berthilde asobanurira Minisitiri w'Intebe iby'umushinga we

Niyibaho yatakambiye Minisitiri w’Intebe amutekerereza uburyo yahuye n’igihombo cyo cy’umusaruro w’ibihumyo ibiro 750, byaboze, nyuma yo kubura inguzanyo yari yiteze guhabwa na Banki.

Niyibaho yabanje kwereka Minisitiri w’intebe uruganda rutunganya imigina y’ibihumyo, uko bafunga ibisigazwa by’ipamba mu dushashi bita imigina nyuma bagashyiramo imbuto, n’izindi nzira zose umusaruro w’ibihumyo unyuramo kugira ngo ugere ku isoko.

Minisitiri w'Intebe yerekwa ibikorwa by'ubuhinzi bw'ibihumyo

Nyuma yo kwereka Minisitiri w’Intebe iby’ubuhinzi bwe bw’ibihumyo, Niyibaho yanerekanye ibiribwa bikorwa mu bihumyo, nk’isambusa, n’ibindi biribwa.

Gusa ariko yavuze ko kubera kubura amafaranga ahagije hari ubwo umusaruro umurusha ubushobozi bigatuma ibihumyo bibora akaba aherutse kumena ibiro bisaga 750 by’ibihumyo byaboze, kamdi aba afite n’ibindi agura mu baturage kuburyo yabuze ayo kwishyura bamwe muri bo.

Niyibaho yavuze ko yatanze umushinga muri Banki itsura amajyambere BRD, nyamara mu gihe cy’ingana n’amezi umunani nta nguzanyo yahawe none bikaba bikomeje kumuhombya.

Niyibaho yongeyeho ko atari ibyo byonyine bimuzitira, kuko kugeza ubu atarabona icyemezo gitsura ubuziranenge, kandi akaba ataremererwa gufunga ibihumyo bye mu mu bifuniko bya Kinyarwanda, ari nabyo bituma ibihumyo bye bijya mu mahanga bifunze mu dupaki twanditseho Uganda.

Minisitiri w’Intebe yashimiye Niyibaho, amwemerera ubuvugizi, anasaba abo bireba kuzamuha raporo y’ibyo bazaba bamufashije mu gihe kitarenze ukwezi.

Habumuremyi akomeza asaba abanyarwanda kwitabira igihingwa cy’ibihumyo. Ati ”Bishobotse buri munyarwanda yahinga ibihumyo kuko birwanya imirire mibi kuko byera vuba kandi ku butaka buto”.
Habumuremyi yasabye ko Ikigo cy’igihugu gitsura ubuziranenge(RBS) gufasha Niyibaho kubona ibyabangombwa, ikamugira inama, ariko ibihumyo bikajya mu mahanga byanditse ho u Rwanda aho kubijyana mu izina rya Uganda.

Inzego z’ubuyobozi zitandukanye zamwemereye inkunga, aho Laboratwari Nkuru y’Igihugu(LAB) yamwemereye imashini zimwe mu zishobora kumufasha gutunganya imigina.

Uruganda rwa Niyibaho rwatangiye mu mwaka wa 2006, ubu rukoresha abakozi bahoraho 30, n’abandi ba nyakabyizi basaga 40, rukaba ruzwi ku izina rya BN Producers.(Belthilde Niyibaho Producers).