Ecobank Rwanda Plc yahaye ba rwiyemezamirimo 40 bafite ibigo biciriritse imashini za POS, zizabafasha gucunga no gukurikirana ibikorwa by’ubucuruzi, mu rwego rwo kubafasha kubiteza imbere no kubyagura.

Ibi bikoresho byatanzwe mu gihe hizihizwaga ‘Ecobank Day’, umunsi ngarukamwaka uba mu bihugu Ecobank ikoreramo.

Mu Rwanda, iki gikorwa cyateguwe na Ecobank Rwanda ku bufatanye na Vanguard Economics, ikigo gifasha mu gukusanya no gusesengura amakuru ajyanye n’ubushakashatsi. Ba rwiyemezamirimo 40 bafite ibigo biciriritse ni bo bahawe ibi bikoresho by’ikoranabuhanga.

Imashini za POS zizabafasha kwandika no kubika amakuru y’ibikorwa by’ubucuruzi mu buryo bw’ikoranabuhanga, kugenzura ibicuruzwa biri mu bubiko, gukurikirana ibyagurishijwe n’andi makuru ajyanye n’imikorere y’ibigo byabo.

Umuyobozi Mukuru wa Vanguard Economics, Dr. Kato Kimbugwe, yashimiye Ecobank Rwanda ku bufatanye bugamije gufasha ba rwiyemezamirimo bafite ibigo biciriritse kubona uburyo bwo kunoza imicungire y’ibikorwa byabo no kubyagura.

Ati “Ubushakashatsi bugaragaza ko ibigo biciriritse mu Rwanda bikunda guhura n’ibibazo byo kubona serivisi z’imari zirimo inguzanyo, guterwa inkunga kubera ko bataba bafite raporo zigaragaza neza ibikorwa byabo, gusa ibi bikoresho by’ikoranabuhanga bizabafasha gukemura ibyo bibazo ndetse babashe no kwagura ibikorwa by’ubucuruzi byabo.”

Yavuze ko Vanguard Economics isanzwe ikorana n’ibigo biciriritse birenga 300, aho ibihugura ku buryo bwo kuzamura no kunoza ibikorwa by’ubucuruzi.

Yasobanuye ko hatoranyijwe ibigo 40 kubera ko iki gikorwa cyahuriranye n’imyaka 40 Ecobank Rwanda imaze ishinzwe.

Umuyobozi Mukuru wa Ecobank Rwanda Plc, Umutoni Carine, yavuze ko ibi bikoresho bizafasha ba rwiyemezamirimo kunoza imikorere no kwagura ibikorwa byabo, anabizeza ko banki izakomeza kubaba hafi.

Ati “Twizera ko ibikoresho tubashyikirije bizabateza imbere ndetse mukabasha kwagura ibikorwa byanyu. Tuzakomeza gukorana namwe no kwifatanya kugira ngo murusheho kugira uruhare rufatika mu iterambere ry’igihugu cyacu.”

Yashimangiye ko Ecobank Rwanda izakomeza gukorana na ba rwiyemezamirimo no kubafasha guteza imbere ibikorwa byabo, kugira ngo barusheho kugira uruhare mu iterambere ry’igihugu.

Prosper Muganza washinze MP Flowers, ikigo gikora kikanacuruza indabo, yavuze ko imashini bahawe izabafasha kurushaho kugenzura no gucunga ibikorwa by’ubucuruzi.

Ati “Hari igihe nakoraga imibare y’ibikorwa by’ubucuruzi byanjye nkabona ntabwo iri guhura gusa ubungubu kubera y’uko byose nzajya mba nabishyize mu mashini, izajya ibiteranya ihita impa igisubizo mu buryo bwihuse kandi ayo makuru azajya aboneka mu buryo bwihuse.”

Yakomeje avuga ko kuba iyi mashini ibika amakuru yizewe bizabafasha no gusaba inguzanyo mu bigo by’imari mu buryo bworoshye, kuko bazajya baba bafite amakuru agaragaza neza imikorere y’ubucuruzi bwabo.

Ecobank ni banki Nyafurika itanga serivisi zitandukanye, zirimo izishingiye ku ikoranabuhanga.

Kugeza ubu, Ecobank ikorera mu bihugu 34 bya Afurika. Mu Rwanda ifite amashami umunani, arimo icyicaro gikuru mu Mujyi wa Kigali, Remera, Kigali Heights, Nyabugogo, Kicukiro, CHIC, Huye na Rusizi.

Ecobank isanzwe ikorana neza n'urubyiruko rufite imishinga y'iterambere

Umuyobozi w’ishami rishinzwe kumenyekanisha ibikorwa muri Ecobank Rwanda, Mana Desire, yerekanye uburyo iyi banki ishyira imbaraga mu guteza imbere ba rwiyemezamirimo bato n'abacirirtse

Umuyobozi Mukuru wa Ecobank Rwanda Plc, Umutoni Carine, yagaragaje ko POS zahawe ba rwiyemezamirimo bato zizafasha kwiteza imbere, ndetse anabizeza imikoranire myiza hagati y’iyi banki nabo

Umuyobozi Mukuru wa Vanguard Economics, Dr. Kato Kimbugwe, yashimiye Ecobank Rwanda yahisemo gukorana na bo kugira ngo bafashe ba rwiyemezamirimo bafite ibigo biciriritse kubona uburyo bateza imbere ibikorwa byabo

Prosper Muganza washinze Ikigo cya MP Flowers gikora kikanacuruza indabo, yavuze ko iyi mashini igiye kuzajya ibafasha kugenzura ibikorwa by’ubucuruzi byabo

Abahawe imashini za POS bavuze ko zizabafasha kwagura ibikorwa byabo