Ku gicamunsi cyo kuri uyu wa gatandatu, tariki ya 28 Mata mu kigo cy’ amashuri cya Ecole Notre Dame de la Providence de Karubanda, habereye igikorwa cyo kwibuka imiryango y’abari abarimu, abakozi n’abanyeshuri b’icyo kigo bishwe muri jenoside yakorewe Abatutsi mu 1994.
Muri uyu muhango uretse abanyeshuri b’ icyo kigo, hari n’abana b’imfubyi bibumbiye mu ishyirahamwe Mumporeze– Mbazi, Ubuyobozi bw’ikigo bukaba bwariyemeje kujya bufatanya n’abo bana mu bikorwa bitandukanye.
Uyu muhango (…)

Ku gicamunsi cyo kuri uyu wa gatandatu, tariki ya 28 Mata mu kigo cy’ amashuri cya Ecole Notre Dame de la Providence de Karubanda, habereye igikorwa cyo kwibuka imiryango y’abari abarimu, abakozi n’abanyeshuri b’icyo kigo bishwe muri jenoside yakorewe Abatutsi mu 1994.

Muri uyu muhango uretse abanyeshuri b’ icyo kigo, hari n’abana b’imfubyi bibumbiye mu ishyirahamwe Mumporeze– Mbazi, Ubuyobozi bw’ikigo bukaba bwariyemeje kujya bufatanya n’abo bana mu bikorwa bitandukanye.

Uyu muhango wabanjirijwe n’igitambo cya misa, hanagaragajwe amafoto ya banyakwigendera, abarimu 10 n’abanyeshuri basaga 100, ndetse hanatwangwa ubutumwa butandukanye bwagarukaga ahanini ku mizi ya jenoside yakorewe Abatutsi mu 1994, ariko hanagaragazwa icyizere cyo kwiyubaka harwanywa ingengabitekerezo yayo burundu, cyane cyane mu rubyiruko.

Umwe mu bana bo mu Ishyirahamwe Mumporeze, Niyibigira Grâce ubwo jenoside yabaga, yari afite imyaka 3, mu buhamya bwe yagarutse ku buzima bwo ku ishuri, maze ashimangira ko kwiyubaka bishoboka, akaba yaratangaje ko kuba yari mu muryango wa AERG aho yigaga byamufashaga mu buzima bwa buri munsi.

Umuyobozi w’ Ikigo cya Ecole Notre Dame de la Providence de Karubanda, Sœur Marie Goreth Mukarubayiza, mu ijambo yagejeje kubari aho, yabasabye kujya bibuka, cyane cyane bisuzuma buri munsi, niba bakiri mu nzira nziza cyangwa se barayobye.

Muri uyu muhango kandi hashimangiwe ubu bufatanye hagati y’iki kigo, n’ishyirahamwe Mumporeze – Mbazi, Ecole Notre Dame de la Providence de Karubanda mu ijwi ry’ umuyobozi wacyo Sœur Marie Goreth Mukarubayiza, ikaba yarashyikirije inkunga iryo shyirahamwe ingana n’amafaranga y’u Rwanda ibihumbi bamaga abiri yo gufasha abaririmo mu buzima bukomeye babamo.

Intumwa ya Rubanda mu Nteko Ishinga Amategeko, Depite Gahondogo Athanasie nawe wari witabiriye uwo muhango, mu butumwa yatanze yashimiye ubuyobozi bw’ icyo kigo kuba buri mwaka butegura gahunda yo kwibuka, ariko anashimangira ko uku kwibuka ari intwaro ikomeye yo kwirinda ko jenoside yazasubira.

Bamwe mu bazize jenoside ku Karubanda

Iki kigo Ecole Notre Dame de la Providence de Karubanda, cyashinzwe mu 1959, giherereye mu Karere ubu ka Huye, aho cyatangiye cyigisha abakobwa gusa.

Ni inkuru twohererejwe na Salomon Uwimana