Umukinnyi wa filime Teyana Taylor ni we watwaye ibihembo byinshi mu bihembo bya BET Awards 2026 byatanzwe mu birori byabaye mu ijoro ryo ku wa 28-29 Kamena 2026.

Ni ibirori byabereye mu nyubako ya Peacock Theater iherereye i Los Angeles, California, muri Leta Zunze Ubumwe za Amerika.

Ni ku nshuro ya 25 ibi bihembo byatanzwe. Umuhanzi w’Umunya-Nigeria, Tems yaraye asusurukije ababyitabiriye.

Muri ibi bihembo, byatangiye gutangwa mu 2001, Teyana Taylor yatwayemo bine ari byo: icy’umukinnyi wa filime wabaye icyamamare, umunyamideli w’umwaka, umukinnyi wa filime w’umugore w’umwaka n’icy’uyobora amashusho ya filime w’umwaka.

Muri sinema kandi, abandi batwaye ibihembo bikomeye ni Druski wahize abandi mu mpano zitanga icyizere, Michael B Jordan wabaye umukinnyi mwiza na Lauryn Hill watwaye icy’umunyabigwi ukiri ku Isi, wanahawe icyubahiro muri ibi birori nk’uwagize impinduka mu myidagaduro ku Isi.

Itsinda rya Clipse ryatsindiye igihembo cya album y’umwaka giherekejwe n’ibindi bibiri. Kendrick Lamar yatwaye bibiri birimo icy’umuhanzi mwiza wa Hip Hop w’umugabo, Cardi B yatwaye icy’umuhanzikazi mwiza wa Hip Hop w’umugore.

Leon Thomas yegukanye igihembo cy’umuhanzi mwiza wa R&B/Pop w’umugabo na ho Kehlani atwara bibiri birimo icy’umuhanzi mwiza wa R&B/Pop w’umugore mu gihe Olivia Dean yatwaye icy’umuhanzi mwiza ukizamuka/utanga icyizere.

Usibye Tems, hari abandi bahanzi basusurikije abitabiriye ibi birori ngarukamwaka dore ko byanatambukaga imbonankubone ku rubuga rwa BET. Abo barimo French Montana, Max B na Rick Ross, SZA, Doechii, Nas, Doja Cat, Queen Latifah na Lauryn Hill.

Bruno Mars, Usher Raymond, Drake, J. Cole, Doja Cat, Latto, Megan Thee Stallion, Beyonce’ na Rihanna ni bamwe mu byamamare batunguranye bataha imbokoboko muri ibi bihembo bimaze kubaka izina rikomeye mu myidagaduro y’Isi.

Reba amafoto yaranze ibi birori