Michael Jackson agiye gukorwaho icyegeranyo kigaruka ku gitaramo yakoreye mu karuhuko ka Super Bowl, mu gihe A$AP Rocky yateguje ibitaramo muri Australia na New Zealand. Ku rundi ruhande Beyoncé yatanze ubufasha bwo kubakira abatagira aho kuba bw’agaciro ka miliyari zisaga 12 Frw.

Igitaramo Michael Jackson, ufatwa nk’Umwami w’injyana ya Pop ku Isi, yakoreye mu karuhuko ka Super Bowl kigiye gukorwaho icyegeranyo cyiswe “Spectacle: Michael Jackson at the Super Bowl”.

Iki cyegeranyo kizerekanwa kuri Hulu na ESPN muri Gashyantare 2027. Kizagaruka ku gitaramo yakoreye muri Rose Bowl mu 1993.

Kizagaragaramo amashusho atarigeze yerekanwa ya Michael Jackson n’ikipe yamufashaga. Hazanerekanwa imbyino ze, imyambarire ye n’indirimbo ze byihariye.

Uyu mushinga uje mu gihe ibigwi by’uyu muhanzi bikomeje kubyazwa umusaruro muri sinema, dore ko haherutse gusohoka filime imugarukaho yitwa ‘Michael’.

Ni filime ikinamo Jaafar Jackson, umwana Michael Jackson abereye se wabo. Igice cyayo gikurikiraho kiri gutunganywa.

Igitaramo cya Michael Jackson kigiye gukorwamo icyegeranyo

A$AP Rocky yateguje ibitaramo muri Australia na New Zealand

Umuraperi w’Umunyamerika A$AP Rocky yatangaje ko mu Ukuboza 2026 azakora ibitaramo bitanu muri Australia na New Zealand, aho aheruka gutaramira mu myaka umunani ishize.

Ibi bitaramo biri mu rugendo yise ‘Don’t Be Dumb World Tour’, yatangiye muri Mutarama 2026. Azarusubukura ku mugaragaro ku wa 5 Ukuboza, ataramira i Melbourne muri Rod Laver Arena.

Azakurikizaho igitaramo kizabera i Sydney muri Afterpay Arena ku wa 9 Ukuboza, icyo muri Auckland muri Spark Arena ku wa 12, icyo muri Brisbane Entertainment Centre ku wa 14 n’icyo muri Perth muri RAC Arena ku wa 17.

Aya matariki atangajwe nyuma y’uko akoze ibitaramo 25 mu bihugu 19 by’i Burayi, amatike yabyo yose akagurwa agashira.

A$AP Rocky yateguje ibitaramo muri Australia na New Zealand

Beyoncé, Kelly Rowland na Tina Knowles bafashije abatagira aho kuba

Beyoncé na Kelly Rowland, bamamaye mu itsinda ry’abanyamuziki rya Destiny’s Child, bafatanyije na Tina Knowles gufasha abatishoboye bo muri Houston muri Amerika.

Bubakiye abatagira aho kuba inyubako bise Knowles-Rowland House, yatwaye miliyoni 8,4 z’Amadolari ya Amerika, agera kuri miliyari zisaga 12 Frw.

Iyi nyubako yatujwemo imiryango 31, inahabwa ibindi bikoresho by’ibanze bizayifasha kubaho neza.

Beyoncé we yatanze ubufasha bw’asaga miliyari 12 Frw ku batagira aho kuba.

Umwana w’imyaka itandatu yabaye umuvangamiziki muto kurusha abandi b’igitsina gore ku Isi

Guinness World Records yatangaje ko umwana w’umukobwa w’imyaka itandatu yanditse amateka yo kuba umuvangamiziki (DJ) muto kurusha abandi b’igitsina gore ku Isi.

Uyu mwana witwa Illumi Maeda akomoka mu Buyapani, akaba yarihebeye uyu mwuga.

Illumi yemera ko umuziki uvura, bityo akifuza gukoresha impano ye mu komora abantu ibikomere.

Umwana w'imyaka itandatu yabaye umuvangamiziki muto ku Isi

J. Cole ategerejwe mu Bwongereza

Umuraperi w’Umunyamerika J. Cole, usanzwe azwi no muri basketball, azataramira mu Bwongereza mu cyumweru gitaha.

Azatangira ku wa 19 Ukwakira 2026, asoze ku wa 26 Ukwakira 2026.

J. Cole ategerejwe mu Bwongereza