Abahanzi bagize itsinda rya Urban Boyz bazahagararira u Rwanda mu iserukiramuco rya muzika rikomeye muri Nigeria, mu ntangiriro za Mata 2015.

Muri iri serukiramuco, Urban Boyz izaba ihagarariye u Rwanda ni na bwo butimire ifite mu gihe mu bandi bahanzi bakomeye mu karere, Awilo Longomba azaba ahagarariye Repubulika Iharanira Demokarasi ya Congo, Sauti Sol ihagararire Kenya.

Aba bahanzi barateganya kuzahita bakorana indirimbo n’ibihangange byo muri Nigeria, harimo Don Jazz, na Iyanya baheruka gukorana, n’abandi.

Muri iri serukiramuco rya muzika rizwi ku izina rya Gidi Culture Festival, Urban Boyz izaririmbira ku rubyiniro rumwe n’abahanzi bamaze kubaka izina mu buryo bukomeye barimo M.I., SDC, Waje, Yemi Alade, Falz, EL(Ghana ), Victoria Kimani(Kenya), igihangange Awilo Longomba wo muri Congo, Temi Dollface, Ebisan Sauti Sol(Kenya) n’abandi benshi.

Ikinyamakuru Bella Naija cyo muri Nigeria cyatangaje ko muri iri serukiramuco rizatangira ku itariki ya 4 Mata 2015, aba DJ b’intyoza mu kuvanga imiziki barimo DJ Neptune, DJ Lambo na DJ Gino Brown (wo muri Afurika y’Epfo) ni bo bazajya basimburana mu gusunika imiziki.

Urban Boyz bavuga ko biteguye guhagararira u Rwanda neza muri iri serukiramuco rizabera ahitwa Eko Atlantic. Nyuma yaryo hari indi mishinga bazashyira hanze haba iyo bakoranye n’abanyamahanga n’indi bafite mu gihugu.

Sosiyete ya Rwandair iri mu baterankunga b’iri serukiramuco ndetse ni yo izafasha abahanzi bo muri Afurika y’Uburasirazuba kugera muri Nigeria, iserukiramuco ryarangira ikabagarura mu bihugu byabo.

TILL I DIE BY URBAN BOYZ FT RIDERMAN