Ku itariki ya 7 Mata 2013, kuri Stade Amahoro, mu mugoroba wo kwibuka ku nshuro ya 19 Jenoside yakorewe Abatutsi, umuhanzi Kizito Mihigo yaririmbye indirimbo yise “Umujinya mwiza” yahimbye agamije kwifatanya n’Abanyarwanda uyu mwaka. Guhera uwo munsi, nk’uko bisanzwe nyuma y’indirimbo z’uyu muhanzi, abanyarwanda batanze ibitekerezo binyuranye, ndetse bamwe banabigaragaza mu magambo ngenerwaruhame bagiye bavuga cyangwa bandika.
Inyikirizo y’indirimbo “Umujinya mwiza”, igizwe n’aya magambo (…)

Ku itariki ya 7 Mata 2013, kuri Stade Amahoro, mu mugoroba wo kwibuka ku nshuro ya 19 Jenoside yakorewe Abatutsi, umuhanzi Kizito Mihigo yaririmbye indirimbo yise “Umujinya mwiza” yahimbye agamije kwifatanya n’Abanyarwanda uyu mwaka. Guhera uwo munsi, nk’uko bisanzwe nyuma y’indirimbo z’uyu muhanzi, abanyarwanda batanze ibitekerezo binyuranye, ndetse bamwe banabigaragaza mu magambo ngenerwaruhame bagiye bavuga cyangwa bandika.

Inyikirizo y’indirimbo “Umujinya mwiza”, igizwe n’aya magambo

“Umujinya mwiza banyarwanda, si uw’umuranduranzuzi. Ahubwo ni udutera gufata ibyemezo biturinda, bidukomeza, biturinda guhungabana mu gihe twugarijwe; tugahangana n’ibibazo, tukisangamo ibisubizo, Jenoside yadushegeshe na yo ikatubera isomo riturinda. Twebwe Abanyarwanda twayirokotse, tuzerekana ko umujinya mwiza atari uwo kwihorera, ko ahubwo ari uwo kwiyubaka, turwanya ubukene n’ubujiji. Umujinya mwiza ni utuma twigira, ukatwubakira ubwigenge. Kandi n’ubundi ngo: Umugabo arigira yakwibura agapfa.”

Bamwe bagaragaje ko iyo mvugo “Umujinya mwiza” atari nziza

Nyuma y’uko iyi ndirimbo isohoka, ku mbuga za Internet hagiye hagaragara ibitekerezo by’abantu benshi bavuga bati “Umujinya mwiza ntubaho.”

Tariki ya 12 Mata 2013, mu muhango wari wateguwe na Nyampinga w’u Rwanda 2012, agamije kwibuka urubyiruko rwishwe muri Jenoside, Kalisa Rugano, umwe mu basaza bafatwa nk’inararibonye mu muco nyarwanda, mu ijambo rye yavuze ko umujinya mwiza udashobora kubaho.

Kalisa Rugano ati ”Bana banjye ndababwiza ukuri, umujinya nta kiza ugira, ahubwo utuma abantu bashaka kwihorera no gukora ibindi bibi byinshi.” Rugano yanongeyeho umugani wa Kinyarwanda ugira uti "Inda yuzuye umujinya uyiha amata ikaruka amaraso."

Kizito Mihigo utari yitabiriye uwo muhango, bukeye bwaho, yanditse ku rubuga rwe rwa Interineti, (www.kizitomihigo.com) ndetse n’urwa Fondation KMP (www.kmp.rw), ati ”Ndasaba Abanyarwanda kujya babanza kwumva indirimbo yose mbere yo kuyitangaho ibitekerezo. None se wabona igitabo, ugasoma izina ryacyo ryonyine, maze ukavuga ko wumvise ubutumwa bukirimo?”

Kizito Mihigo aririmba "Umujinya mwiza" kuri Stade Amahoro ku wa 7 Mata 2013

Hari abandi bagiye bagaragaza ko umujinya mwiza ushoboka

Ku itariki ya 10 Mata 2013, mu kiganiro Minisitiri w’Urubyiruko n’Ikoranabuhanga yatanze muri Kaminuza Nkuru y’u Rwanda i Butare, Jean Philibert Nsengimana yakoresheje iyi mvugo. Yagize ati “Umujinya mwiza, n’Icyizere biri mu bikwiye kuranga Abanyarwanda nyuma ya Jenoside.”

Ku itariki ya 28 Mata 2013, umuyobozi wungirije wa Kaminuza yo mu Mutara (Umutara Polytechnic), Dr Ndabaga Eugene, yanditse mu Kinyamakuru “The New Times” inyandiko ndende ishyigikira ibitekerezo biri mu ndirimbo “Umujinya mwiza”. Dr Eugene Ndabaga avuga ko muri iyi ndirimbo harimo ubucurabwenge buhanitse, kandi ko mu butumwa bwe, umuhanzi Kizito Mihigo yatanze umusanzu ukomeye mu kubaka imyumvire y’Abanyarwanda.

Ku itariki ya 24 Mata 2013, abayobozi b’umuryango World Vision mu Rwanda, ubwo bitabiraga igitaramo Kizito Mihigo na Fondation ye bakoreye amashuri yo mu karere ka Nyamagabe, bagarutse ku magambo “Umujinya mwiza”, bavuga ko Abanyarwanda benshi bari bakwiye gukoresha akababaro n’uburakari bagize, bakabikoresha mu nzira nziza yo kwiyubaka no kubaka igihugu, aho kubikoresha mu gusenya.

Perezida wa Repubulika, mu kiganiro yatanze mu kigo cy’ubushakashatsi “Milken Institute” i Los Angeles muri Leta zunze ubumwe za Amerika ku itariki ya 30 Mata 2013, na we yavuze interuro igira iti “Kwiyubaka kw’Abanyarwanda gushingiye ku mujinya wubakiye ku mateka.”

Ubutumwa buri muri iyi ndirimbo ya Kizito Mihigo, na none bwatera umuntu gutekereza ku magambo yavuzwe n’umuhanga w’umugereki Aristote. Uyu we yaravuze ngo “Umujinya ni ngombwa. Iyo utatubereye umutware, ahubwo ukatubera umusirikare, utuma dutsinda.”

Indirimbo “Umujinya Mwiza”, kuri Youtube, nyuma y’ukwezi kumwe imaze kurebwa n’abantu Ibihumbi makumyabiri na bitandatu.

Reba iyo ndirimbo hano

Inkuru bifitanye isano