IGIHE

Abahanzi b’indirimbo zihimbaza Imana basuye urwibutso rwa Jenoside rwa Ntarama

0 14-05-2022 - saa 08:14, Nsengiyumva Emmy

Bamwe mu bahanzi bahuriye mu gikorwa cya Rwanda Gospel Stars Live basuye Urwibutso rwa Ntarama, igikorwa bafatanyije no gufasha uwarokotse Jenoside yakorewe Abatutsi mu 1994.

Ni igikorwa cyabaye ku wa 13 Gicurasi 2022, umunsi abahanzi bari mu gikorwa cya Rwanda Gospel Stars Live basuyeho Urwibutso rwa Jenoside rwa Ntarama mu Karere ka Bugesera banaremera Umubyeyi warokotse Jenoside yakorewe Abatutsi.

Gahunzire Aristide usigaye ushinzwe imirimo yo gutegura ‘Rwanda Gospel Stars Live’ yabwiye IGIHE ko bahisemo gukora iki gikorwa mu rwego rwo gusobanukirwa neza amateka y’u Rwanda.

Ati “Turi abahanzi mu muziki wo kuramya no guhimbaza Imana ariko ku rundi ruhande turi Abanyarwanda. Aya ni amateka yacu tugomba kuyiga tukayamenya bikanadufasha kuba twayasobanurira abandi batayazi, ni inzira ituganisha ku iterambere kuko utazi iyo ava ntanamenya iyo ajya.”

Gahunzire avuga ko ikindi bigiye ku mateka y’u Rwanda basanze kuri uru Rwibutso rwa Jenoside yakorewe Abatutsi rwa Ntarama, ari ubwitange n’umuhate waranze ingabo zahoze ari iza FPR Inkotanyi zahagaritse Jenoside yakorerwaga Abatutsi zikanabohora Igihugu.

Ati “Ikindi twamenye ni uko kugira ngo amateka mabi yacu ahagarikwe byasabye ubwitange bw’Abanyarwanda, umuhate wabo ndetse bamwe bahasize ubuzima. Tugomba guharanira kusa ikivi basize tugateza imbere igihugu babohoye. Kandi tukirinda ko ibyabaye byakongera ukundi turwanya ingengabitekerezo ya Jenoside aho yaturuka hose.”

Nyuma yo gusura Urwibutso rwa Jenoside yakorewe Abatutsi rwa Ntarama, aba bahanzi bahise bajya kuremera umwe mu barokotse.

Bakigera iwe mu rugo, Mukabutera Emerita yabakiriye abaha ubuhamya bw’ubuzima yabayemo mu gihe cya Jenoside yakorewe Abatutsi, nyuma nabo bamushyikiriza ibyo bari bamushyiriye byari byiganjemo ibyo kurya ndetse n’ibikoresho by’isuku.

Ibikorwa bifite inyungu umuryango nyarwanda muri rusange ni kimwe mu byo abategura igikorwa cya Rwanda Gospel Stars Live biyemeje gukora.

Gaby Kamanzi na Aristide Gahunzire ushinzwe gutegura igikorwa cya Rwanda Gospel Stars Live
Gaby Kamanzi ni umwe mu bahanzi bari bitabiriye iki gikorwa
Gaby Kamanzi na Gahunzire Aristide bashyira indabo ku mva ishyinguyemo imibiri y'Abatutsi bishwe bazira uko baremwe
Abahanzi bose bafashe umwanya bunamira Abatutsi bishwe muri Jenoside bahowe uko baremwe
Aristide Gahunzire yasize ubutumwa mu gitabo cy'abashyitsi cyo ku Rwibutso rwa Jenoside yakorewe Abatutsi i Ntarama
Nyuma yo gusura Urwibutso rwa Jenoside yakorewe Abatutsi rwa Ntarama, aba bahanzi bahise bajya kuremera umwe mu barokotse
Abahanzi ba Gospel mu rugo rwa Mukabutera Emerita bari bagiye kuremera
Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza