Mu ijoro ryo ku wa 13 Kanama 2026, The Ben yitabiriye igitaramo cya Gen-Z Comedy cyabereye muri Camp Kigali, aho abagitegura bizihizaga imyaka ine ishize batanga ibyishimo n’imyidagaduro ku bakunzi b’urwenya.

Muri iki gitaramo, The Ben yaganirije abacyitabiriye ku ngingo zitandukanye, ariko by’umwihariko anaboneraho gukangurira urubyiruko kwirinda inzoga zitujuje ubuziranenge.

The Ben yanaganirije urubyiruko rwari rwitabiriye iki gitaramo, anaboneraho kubatera urwenya binyuze mu nkuru zo mu buzima bwe bwo hambere.

Yabajijwe ikintu cyamubayeho mu buto atajya yibagirwa, cyane cyane mu gihe yigaga ku ishuri rya Gahini aho yize ayisumbuye.

Yagize ati “Twagiraga itsinda twitaga Aba Blues ry’abana b’abahanga ariko bakunda gukubagana. Umunsi umwe naje kuzimya amatara y’ikigo, kandi hari ukuntu yari afatanye n’ay’ibitaro. Ubwo mba nzimije ibitaro n’ikigo. Baranyirukanye, ndagenda ngeze i Kayonza mpamagara umuyobozi w’ishuri nigize umusirikare. Navuze amagambo nk’atatu ya gisirikare, ahita ambwira ati abana ni abana, mureke agaruke. Ni nde wamwirukanye?”

Ku rundi ruhande, The Ben yavuze ko ikindi yari azwiho ku ishuri ari uko yagiraga amahirwe yo gutereta abana b’abayobozi b’ishuri.

Ati “Nagiraga amahirwe yo gutereta abana ba ba directeur. I Gahini abantu babizi, nari mfite umukobwa twakundanaga, mwiza cyane, witwa Mahoro. Mu bwana nagiraga amahirwe yo kubona ibintu byiza cyane.”

Uretse The Ben, iki gitaramo cyitabiriwe n’abanyarwenya banyuranye, biganjemo abakuriye muri Gen-Z Comedy, barimo Pirate, Umushumba, Muhindee wanakiyoboye, Lucky Baby, Kaduhire Kadudu, Rumi, Inkirigito Clement, Musa na MC Kandii n’abandi.

Ni igitaramo kandi cyaririmbyemo Bolingo Paccy, wanaboneyeho gutumira abakunzi b’umuziki we mu gitaramo afite ku wa 20 Kanama 2026, kizabera ahitwa Copenhagen Kicukiro.

Rumi ni umwe mu banyarwenya bagezweho muri Gen-Z Comedy watanze ibyishimo

Inkirigito Clement yashimishije abitabiriye iki gitaramo cy'urwenya

Sonia Mutako ni umwe mu badakunze gucikwa na Gen-Z Comedy

Kaduhire Kadudu ni umwe mu bakobwa bake bihebeye ibyo gutera urwenya

The Ben yahageze kare abanza no kumva urwenya

Burikantu na Buringuni ntibakunze gutangwa muri Gen-Z Comedy

Gakuba Familly bakunzwe ku rubuga rwa YouTube bitabiriye iki gitaramo

Gakuba Family bafatanye ifoto y'urwibutso na The Ben

Fally Merci yizihizaga imyaka ine amaze ategura Gen-Z Comedy

Bolingo Paccy, wanaboneyeho gutumira abakunzi b’umuziki we mu gitaramo afite ku wa 20 Kanama 2026

Clapton Kibonge na Mama Sava bari mu baherekeje The Ben muri iki gitaramo

Pirate yahuye na The Ben bamenaho abiri nubwo muri 'Summer Country Tour' uyu munyarwenya atamworoheye

Umushumba nawe yishimiwe bikomeye muri iki gitaramo

Shizzo ni umwe mu bitabiriye iki gitaramo

Umuvugizi w'Umujyi wa Kigali, Emma Claudine yari mu bitabiriye iki gitaramo

Ni ubwa mbere The Ben yari yitabiriye Gen-Z Comedy

The Ben yaganirije abitabiriye iki gitaramo kiri mu bikunzwe n'urubyiruko

The Ben yaboneyeho gusaba urubyiruko gucika ku nzoga zitujuje ubuziranenge

Ubwitabire bwari hejuru muri iki gitaramo

The Ben yataramiye abitabiriye iki gitaramo

Abafana ba The Ben ntibajya bamutenguha...

Ihema rya Camp Kigali ryari ryakubise ryuzuye muri iki gitaramo

Amafoto: Kwizera Remy Moses