Ubuyobozi bw’Ikibuga cy’Indege Mpuzamahanga cya Nashville, muri Leta ya Tennessee muri Amerika, bwemeje ko icyo kibuga cyitirirwa umuhanzi Dolly Parton wapfuye mu kwezi gushize.

Abagize inama y’ubuyobozi bw’ikibuga bose bashyigikiye icyo cyemezo mu itora ryabaye ku wa Gatanu, tariki ya 11 Nzeri 2026. Icyakora, izina nyirizina ikibuga kizahabwa ntiriratoranywa, kandi ibikorwa byo kurihindura bizafata igihe.

Parton yitabye Imana muri Kanama 2026 afite imyaka 80. Yari azwi cyane mu muziki wa country, ariko anashimirwa uruhare yagize mu guteza imbere Tennessee no gufasha abana kubona ibitabo binyuze mu muryango we Imagination Library.

Igitekerezo cyo kumwitirira ikibuga cy’indege cyatangiye kuvugwa mu mwaka ushize. Muri Kanama uyu mwaka, cyashyigikiwe na Freddie O’Connell uyobora Umujyi wa Nashville, ndetse na Guverineri wa Tennessee, Bill Lee.

Lee yavuze ko ubuzima bwa Parton bufitanye isano ikomeye n’amateka ya Tennessee, kandi ko ari iby’agaciro kuba abagenzi bagera muri iyo leta bakirwa n’izina rye.

Guhindura izina ry’ikibuga bizasaba kuvugurura ibyapa, imodoka zitwara abagenzi imbere mu kibuga, imyambaro y’abakozi n’inyandiko z’ubucuruzi.

Ubuyobozi bw’ikibuga bwatangaje ko bukiganira n’ababifitemo uruhare kugira ngo bwemeze uko izina n’umurage bya Dolly Parton bizagaragazwa.

Parton yanashinze Dollywood, pariki y’imyidagaduro iri muri Tennessee. Bivugwa ko ibikorwa byayo byinjiriza iyo leta hafi miliyari 1,8$ buri mwaka.

Dolly Parton ashobora kwitirirwa Ikibuga cy’Indege Mpuzamahanga cya Nashville