Ikipe y’u Rwanda y’Abagore ya Volleyball yatangiye neza Igikombe cya Afurika cya 2026, itsinda Algeria amaseti 3-0 mu mukino wa mbere wo mu Itsinda D ry’iri rushanwa riri kubera i Nairobi muri Kenya.

Uyu mukino wabaye kuri uyu wa Kabiri, tariki wa 25 Kanama 2026 muri Ulinzi Complex Hall.

U Rwanda rwatsinze amaseti yose uko ari atatu, aho rwatsinze iya mbere ku manota 25-22, iya kabiri kuri 25-20 ndetse n’iya gatatu kuri 25-16.

Muri rusange, umukino wamaze isaha imwe n’iminota 33, aho Kapiteni w’u Rwanda, Munezero Valentine, yagize uruhare rukomeye muri iyi ntsinzi, atsinda amanota 16.

Tuyishime Aloysie na we yitwaye neza atsinda amanota 14, mu gihe Dusabe Flavia yatsinze amanota 10 angana n’aya Abderrahim watsinze menshi ku ruhande rwa Algeria.

Ikipe y’u Rwanda iyobowe n’umutoza w’Umufaransa Frédéric Guerin, izasubira mu kibuga ku wa Gatatu ikina na Repubulika Iharanira Demokarasi ya Congo.

U Rwanda rwatangiye neza Igikombe cya Afurika cya Volleyball rutsinda Algeria

Ikipe y'Igihugu y'Abagore yatsinze Algeria mu mukino wayo wa mbere i Nairobi