Guhera ku Cyumweru tariki ya 20 kugeza ku ya 27 Gashyantare 2022, mu Rwanda hazabera isiganwa rizenguruka igihugu "Tour du Rwanda" rigiye kuba ku nshuro yaryo ya 14 kuva ribaye mpuzamahanga.

Ni isiganwa rya kane rigiye kuba riri ku rwego rwa 2,1 nyuma y’atatu aheruka, arimo abiri yegukanywe n’Abanya-Erythrée; Merhawi Kudus (mu 2019) na Natnael Tesfazion (mu 2020) ndetse n’Umunya-Espagne Cristian Rodriguez mu 2021.

Uretse u Rwanda ruzaba rufitemo abenegihugu 12, u Bufaransa buzaba bufitemo abakinnyi 10, ni ikindi gihugu kizaba gifite abenegihugu benshi muri iri rushanwa rigizwe n’uduce umunani tuzaba tugizwe n’ibilometero 937,1 byose hamwe.

Imibare y’ingenzi muri Tour du Rwanda 2022:

1- Ni ku nshuro ya mbere u Rwanda ruteguye Tour du Rwanda nyuma yo kwemererwa kwakira Shampiyona y’Isi y’Amagare izaba mu 2025.

Ni ubwa mbere Tour du Rwanda igiye gutangizwa na ‘prologue’ [abakinnyi basiganwa n’ibihe ku giti cyabo] kuva igiye kuri 2,1.

2- Uyu ni umwaka wa kabiri ikigo gikora ibijyanye no guteza imbere ubukerarungo cya Visit Rwanda, kizahemba umukinnyi uyoboye abandi mu isiganwa, ahabwe umwenda w’umuhondo.

3- Abanyarwanda 12 bazitabira Tour du Rwanda bazaba bari mu makipe atatu: Team Rwanda (5), Benediction Ignite (5) na ProTouch (2).

Abakinnyi batatu bigeze gutwara Tour du Rwanda bazakina irushanwa ry’uyu mwaka. Abo ni Nsengimana Jean Bosco [Benediction Ignite], Mugisha Samuel [ProTouch] na Natnael Tesfazion [Androni Giocattoli].

4- Mu irushanwa ry’uyu mwaka, hari abakinnyi bo mu bihugu bine bishya bitari bisanzwe byitabira Tour du Rwanda ari byo Danemark, Hongrie, Norvège na Thaïlande. Mu 2021 byari bibiri: Roumanie na Singapour. Irushanwa rigiye kuba ku nshuro ya kane riri ku rwego rwa 2,1 kuva mu 2019.

5- Amakipe atanu mashya ni yo azagaragara muri Tour du Rwanda 2021: Burgos-BH (Espagne), Team Coop (Norvège), U-23 Grande-Bretagne, Grant Thornton-Bike Zone (Thaïlande) na Saris Rouvy Sauerland (mu Budage). Mu 2021 yari ane.

5- Umubare w’abakinnyi buri kipe ikinisha muri Tour du Rwanda. B&B Hotels izakinisha abakinnyi bane kuko Miguel Heidemann yasanzwemo COVID-19 akigera mu Rwanda.

5- Uduce twinshi twegukanywe n’abakinnyi batatu: Ndayisenga Valens, Umunya-Eritrea Metkel Eyob n’Umunya-Colombia Jhonatan Restrepo.

8- Abakinnyi umunani bigeze gutwaraho agace k’isiganwa muri Tour du Rwanda, no muri uyu mwaka wa 2022 baritabira (mu 2020 no mu 2019 bari icyenda): Eyob (5), Lagab (4), Nsengimana (4), Restrepo (4), Alain Boileau (3), Pierre Rolland (1), Lozano (1) na Mugisha Samuel (1). Mu 2021 bari batandatu.

8- Umubare w’uduce tugize Tour du Rwanda 2021.

11- Umubare w’inshuro nyinshi zitabiriwe n’umukinnyi umaze gukina Tour du Rwanda kenshi, akaba ari Umunyarwanda Nsengimana Jean Bosco uyikina uyu mwaka, aho yahereye mu 2012. Yahigitse Gasore Hategeka wayikinnye hagati ya 2009 na 2017.

12- U Rwanda ni cyo gihugu kizaba gihagarariwe n’abakinnyi benshi (12) muri Tour du Rwanda 2022, bagabanyije mu makipe atatu (Team Rwanda, Benediction Ignite na ProTouch).

U Bufaransa burugwa mu ntege n’abakinnyi 10 bagabanyije mu makipe atatu (B&B Hotels-KTM, TotalEnergies na Team Novo Nordisk).

18- Merhawi Kudus ni we mukinnyi muto wegukanye agace ka Tour du Rwanda. Yabikoze mu 2012 ubwo yari afite imyaka 18 n’amezi 10. Abandi bageze kuri ibi bafite imyaka mike ni Natnael Berhane wari ufite imyaka 20 n’amezi 11 mu 2010 ndetse na Ndayisenga Valens wari ufite imyaka 20 n’amezi 11 mu 2013.

19- Umubare w’amakipe azakina Tour du Rwanda 2022.

20- Mugisha Samuel ni we mukinnyi muto wegukanye Tour du Rwanda, aho mu 2018 yayitwaye afite imyaka 20 n’amezi umunani. Mu 2014, Ndayisenga Valens yayitwaye afite imyaka 21 n’amezi 11, mu 2017 Areruya Joseph ayitwara afite imyaka 21 n’amezi 11, mu 2010 Daniel Teklehaimanot yayitwaye afite imyaka 22 mu gihe Nsengimana Jean Bosco yayitwaye mu 2015 afite imyaka 22.

20- Abakinnyi bavuye mu bihugu 20 ni bo bazitabira Tour du Rwanda igiye kuba ku nshuro ya 14. Iri ni irushanwa rya gatatu ryitabiriwe n’abakinnyi bo mu bihugu byinshi mu mateka ya Tour du Rwanda, inyuma y’irya 2020 ryitabiriwe n’abo mu bihugu 26 n’irya 2021 ryitabiriwe n’abo mu bihugu 24.

24- Agahigo k’uduce twinshi tw’isiganwa twegukanywe na Erythrée, ikurikiwe n’u Rwanda (19), Maroc (9), Afurika y’Epfo na Leta Zunze Ubumwe za Amerika (8).

27- Umubare w’abakinnyi bakinnye Tour du Rwanda mbere yo kujya mu makipe akomeye akina amarushanwa yo ku rwego rw’Isi: Aït El Abdia, Berhane, Chaoufi, Craven, De Bod, M.Debesay, Ghebreigezabhier, J.Janse van Rensburg, R.Janse Van Rensburg, Girmay, Grmay, Jim, Kudus, Meintjes, Nyionshuti, Reijnen, Rosskopf, Smit, Teklehaimanot, Thomson, Van Zyl, O.Goldstein, Badilatti, Guglielmi, Bellicaud, Sobrero na Fedorov.

50- Abakinnyi bashya batigeze bitabira Tour du Rwanda na rimwe, barakina iry’uyu mwaka. Bangana na 55,5% by’abakinnyi bose bitabira. Mu 2021 bari 62,7%, mu 2020 bari 52,5%, 48,7% mu 2019, 62,5% mu 2018, 59,2% mu 2017 na 54% mu 2016.

203- U Rwanda ni rwo rumaze guhagararirwa n’abakinnyi benshi (203) kuva mu 2009 kugeza uyu mwaka (ubariyemo n’abagenda bagaruka). U Bufaransa ni 84, Erythrée 75, Afurika y’Epfo 66, Kenya 57, Ethiopie 53, Algérie 43, Cameroun 32, Leta Zunze Ubumwe za Amerika 31 n’u Bubiligi 29.

635- Abakinnyi 635 bamaze kwitabira Tour du Rwanda, ubaze abaje buri mwaka (harimo n’abagaruka) bose hamwe bakaba 1025 kuva mu 2009.

850- Umubare w’abantu bemerewe kwitabira Tour du Rwanda 2022 mu buryo bunyuranye (accréditées). Bangana na 850 bo mu 2021, ariko bari munsi ya 980 bayitabiriye mu 2020.

937- Ibilometero byose by’irushanwa ry’uyu mwaka ni 937,1. Agace kagufi kazaba ari aka mbere, aho abakinnyi bazasiganwa n’ibihe ku giti cyabo, bagakora intera y’ibilometero 4,0 tariki ya 20 Gashyantare, bahagurukiye ndetse bakanasoreza kuri Kigali Arena. Agace karekare ni aka Kigali-Rubavu, kazaba ari aka gatatu, kazakinwa ku wa Kabiri tariki ya 22 Gashyantare ku ntera y’ibilometero 155,9.

Impuzandengo y’umuvuduko uri hejuru (ku rutonde rusange rwa nyuma) ni: 40,43 km/h (2017) – 39,72 (2019) - 39,55 km/h (2012) - 39,18 km/h (2013) –38,91 km/h (2018) - 38,83 km/h (2015) - 38,52 km/h (2010) – 37,94 km/h (2016) - 37,43 km/h (2014) - 37,29 km/h (2011) - 36,43 km/h (2009).

Abakinnyi bo mu bihugu 20 bagabanyije mu makipe 19 ni bo bagiye gukina Tour du Rwanda 2022

Nsengimana Jean Bosco agiye gukina Tour du Rwanda ku nshuro ya 12

Cristian Rodriguez watwaye Tour du Rwanda 2021 ntabwo yitabiriye iy'uyu mwaka