Sandy Dujardin ukinira TotalEnergies yo mu Bufaransa yegukanye Agace ka Kabiri ka Tour du Rwanda 2022 kahagurukiye kuri Stade Amahoro i Remera kagasorezwa i Rwamagana ku ntera y’ibilometero 148,3.

Kuri uyu wa Mbere, tariki ya 21 Gashyantare, ni bwo abakinnyi b’amakipe 19 ari gukina Tour du Rwanda y’uyu mwaka babyukiye mu muhanda bakina agace ka Kigali- Rwamagana.

Abakinnyi bane barimo Abanya-Maroc n’Umwongereza Hayter Leo bayoboye isiganwa kuva mu Gatsata kugeza i Rwamagana, ariko kuzenguruka intera y’ibilometero 6,5 inshuro 10 muri uyu mujyi wo mu Burasirazuba byasize hatsinze Sandy Dujardin kuri sprint.

Dujardin yakoresheje amasaha atatu, iminota 28 n’amasegonda 25, anganya ibihe n’abandi benshi barimo Uhiriwe Byiza Renus wa Team Rwanda, we wabaye uwa gatanu.

Ku rutonde rusange nyuma y’uduce tubiri tumaze gukinwa, Alexandre Geniez na we ukinira TotalEnergies ni we uyoboye n’amasaha atatu, iminota 33 n’amasegonda atandatu, arusha amasegonda atandatu Restrepo Jhonatan wa Drone Hopper- Androni mu gihe Dujardin arushwa arindwi.

Uhiriwe Byiza Renus ni we Munyarwanda uza hafi, aho arushwa amasegonda 20 ku mwanya wa 22.

Tour du Rwanda 2022 izakomeza ku wa Kabiri hakinwa agace karekare ka Kigali- Rubavu kazaba kareshya n’ibilometero 155,9.

UKO ISIGANWA RYAGENZE:

– Alexandre Geniez wa TotalEnergies akomeje kwambara umwenda w’umuhondo

– 12:52 Sandy Dujardin wa TotalEnergies ni we watsinze nyuma yo gusoreza mu gikundi kuri sprint.

🚨AMAKURU MASHYA🚨

Dujardin Sandy ukinira TotalEnergies yegukanye agace ka kabiri ka #TdRwanda22 ka Kigali - Rwamagana. pic.twitter.com/3taS9tYqDm

— IGIHE (@IGIHE) February 21, 2022

12:44 Babiri ba mbere bamaze kwinjira mu kuzenguruka bwa nyuma. Ubu hasigaye ibilometero 6,5 ndetse ikinyuranyo ni amasegonda 40 gusa.

12:37 Ikinyuranyo kigeze ku munota n’amasegonda 26. Abakinnyi bari kuzenguruka inshuro ibanziriza iya nyuma i Rwamagana.

Abasiganwa bamaze kuzenguruka inshuro esheshatu mu Mujyi wa Rwamagana.
Hasigaye enye ngo hamenyekane uwegukanye Agace ka Kabiri ka #TdRwanda22. pic.twitter.com/1HpNifTkSr

— IGIHE (@IGIHE) February 21, 2022

12:35 Hasigaye kuzenguruka inshuro ebyiri gusa zingana n’ibilometero 13. Ikinyuranyo kingana n’umunota n’amasegonda 50.

– 12:30 Guhatana byeruye bigiye gutangira

Ubu abakinnyi babiri bari imbere bamaze gukora ibilometero 131 [Hasigaye 18]. Basize igikundi iminota ibiri n’amasegonda icyenda gusa.

12:25 Ikinyuranyo gikomeje kugabanuka kuko ubu ni iminota ibiri n’amasegonda 30 nyuma y’ibilometero 127.

12:18 Ubu bageze ku kilometero cya 121. Igikundi cyasizwe iminota itatu n’amasegonda 15. Ibihe bitangiye kugabanyuka uko isiganwa rigenda risatira umusozo.

12:14 Sabbahi avuye mu bakinnyi bayoboye. Kuri ubu isiganwa riyobowe na babiri ari bo Hayter uri imbere na Stockman. Mwibuke ko bayoboye isiganwa kuva mu Gatsata.

12:12 Igikundi cyagaruye Merchan wari ushatse gucomoka. Ubu hamaze gukorwa ibilometero 117 ndetse cyasizwe iminota itatu n’amasegonda 30.

12:09 Team Coop ni yo iri imbere mu gikundi gikomeje gushaka uburyo gifata abakinnyi bari imbere. Kuri ubu basizwe amasegonda 25 mu gihe hakirimo iminota itatu n’amasegonda 38 ku barimo Hayter bayoboye isiganwa.

12:02 Ubu hamaze gukorwa ibilometero 109. Batatu bari imbere bashyizemo iminota itatu n’amasegonda 10 hagati yabo na bane babakurikiye. Igikundi kiri ku minota itatu n’amasegonda 50.

12:00 Abakinnyi bane bacomotse mu gikundi basizwe n’abatatu ba mbere iminota 2 n’amasegonda 50 mu gihe igikundi cyasizwe iminota itatu n’amasegonda 20.

– 11:55 Abakinnyi bane basohotse mu gikundi nyuma y’ibilometero 103 bimaze gukorwa. Abo ni Ormston (ProTouch), Mol (Bike Aid), Mugisha Samuel (ProTouch) na Merchan (Drone Hopper).

– Abakinnyi bakomeje kuzenguruka i Rwamagana

Kuva hafi ku kilometero cya 90, abakinnyi bari kuzenguruka intera y’ibilometero 7,5 i Rwamagana hafi y’ahasorezwa isiganwa kuri Dereva Hoteli. Barazenguruka inshuro 10.

11:45 Ikinyuranyo gikomeje kugabanuka hagati y’abayoboye isiganwa n’abari mu gikundi.

Nyuma y’ibilometero 97 bimaze gukorwa, ubu harimo iminota itatu n’amasegonda 47.

– Abanyarwanda bongeye kuryoherwa n’igare

Bitandukanye n’umwaka ushize aho Tour du Rwanda yabaye icyorezo cya COVID-19 cyarakajije umurego, ubu Abanyarwanda birekuye ku mihanda baryoherwa n’igare.

11:25 Ku kilometero cya 82, ikinyuranyo kimaze kuba iminota ine n’amasegonda 45 hagati y’abayoboye n’igikundi.

– AMANOTA YA SPRINT YA KABIRI

11:23 Amanota ya Sprint ya kabiri atangiwe ku kilometero cya 82,6 kuri Sitasiyo SP i Rwamagana, yegukanywe na: Sabbahi akurikiwe na Stockman naho Hayter aba uwa gatatu.

11:15 Ikinyuranyo kimaze kuba iminota ine n’amasegonda 10 nyuma y’ibilometero 72.

– 11:10 Maatougui atakaye mu bakinnyi bayoboye isiganwa rigeze ku kilometero cya 70. Batatu ni bo basigaye imbere barimo Hayter, A Stockman na Sabbahi.

– AMANOTA Y’AGASOZI KA KABIRI

11:08 Amanota y’agasozi ka kabiri atangiwe i Ntunga ku kilometero cya 69,6. Yegukanywe na Sabbahi akurikiwe na Hayter.

– 11:04 Ikipe ya Tarteletto yo mu Bubiligi iyoboye igikundi nyuma y’ibilometero 65 bimaze gukorwa.

–  Umujyi wa Rwamagana ni wo usorezwamo Agace ka Kabiri

Rwamagana ni Akarere gaturanye n’Umujyi wa Kigali. Kari ku buso bwa kilometero kare 682, mu Ntara y’Iburasirazuba.

Iyi ntara ifite icyicaro muri Rwamagana, kukageramo ni ibilometero 50 uvuye muri Kigali.

Aka Karere gafite umwihariko wo kuba ak’ubucuruzi kuva mu myaka yo hambere ubwo Abarabu batangiraga kuhatura. Ahitwa Uswahilini ni ho hatangirijwe ubucuruzi mu Rwanda.

Akarere ka Rwamagana kari mu turere dutatu twatoranyijwe mu mijyi ikikije Kigali (Satellite City) kimwe na Bugesera na Muhanga, nyuma yo kubona ko twegereye Umujyi wa Kigali tukaba tuzahabwa umwihariko mu bikorwaremezo bitandukanye birimo nk’ibice byahariwe inganda.

Aka karere gafatwa nk’igicumbi cy’indabo i Rwamagana, kuko ari hakorera Bella Flowers.

Rwamagana ni kamwe muri turindwi tugize Intara y’Iburasirazuba kakaba ari nako karimo icyicaro cyayo. Kagizwe n’imirenge 14, utugali 82, imidugudu 474 n’ingo 74175, aho izingana na 63.5% zituye ku midugudu. Gafite ubuso bungana na kilometero kare 682 n’abaturage 313,461, bari ku bucucike bwa 460 kuri kilometero kare imwe.

Ukigera muri aka karere usanganirwa n’ubuhinzi kuko butunze benshi cyane, aha twavuga ubuhinzi bw’ibihingwa birimo urutoki, ibigori, ikawa, imbuto, indabo, n’ibindi. Abifuza gukora ubucuruzi buciriritse n’abashaka guhaha ntibibagiranye kuko gafite n’isoko rya kijyambere riherereye mu murenge wa Kigabiro.

Kimwe n’indi mijyi, ibikorwa remezo nk’imihanda myiza, amagorofa, ibitaro, amashuri n’ibindi ntibyatanzwe muri Rwamgana. Gahunda yo guteza imbere ibikorerwa mu Rwanda (Made in Rwanda), ntiyasigaye inyuma kuko hari agakiriro kabarizwamo ibikoresho by’ubwubatsi n’ububaji, aha kandi hanafasha urubyiruko rwinshi kubona icyo rukora.

10:56 Israel Premier Tech yiyunze kuri TotalEnergies mu makipe ayoboye igikundi cyasizwe iminota ine n’amasegonda 22. Hamaze gukorwa ibilometero 62.

– 10:47 Alexandre Geniez mu bayoboye igikundi

Hamaze gukorwa ibilometero 56 ndetse ikinyuranyo kiri ku minota ine n’amasegonda 22. Itsinda ririmo Alexandre Geniez wambaye umwenda w’umuhondo ni ryo riyoboye igikundi.

–  Abanyarwanda bahagurukanye icyizere

Kapiteni wa Team Rwanda, Uhiriwe Byiza Renus, yavuze ko yiteguye kwitwara neza mu Gace ka Kabiri ka Tour du Rwanda.

Ati “Twabonye amagare mashya, ayo twari dufite ni ay’ibiboko bya feri ari ubu ni disque, zidufasha mu mvura, kuko zifatika. Ni cyo kintu gitandukanye kandi ni electronique. Nizeye ko agace ka Tour du Rwanda nshobora kukegukana.”

–  Abinjira i Rwamagana bahawe ikaze mu buryo buteye amabengeza

Mu marembo y’Intara y’Iburasirazuba, hatatswe indabo zitanga ikaze ku basiganwa ndetse n’abandi bagera kuri 850 bitabiriye Tour du Rwanda.

Indabo zashyizwe muri aka gace ni iza Bella Flowers, umushinga uhinga indabo mu Karere ka Rwamagana.

Bella Flowers ni umushinga umaze imyaka itandatu uhinga indabo, ubikorera ku buso bungana na hegitari 40, ugahinga amoko 18 y’indabo za rose mu mabara icumi. Ni indabo ngo zikunzwe cyane ku masoko y’Iburayi na Aziya ndetse na bimwe mu bihugu bya Afurika. Nibura buri cyumweru Bella Flowers bohereza mu mahanga hagati ya toni 20 na 30. Bagakoresha abakozi barenga 730.

Mu myaka ine yawo ya mbere wari umaze kwinjiza arenga miliyari 10 Frw.

– 10:38 Hamaze gukorwa ibilometero 50

Kuri ubu abakinnyi bane bari imbere bamaze gukora ibilometero 50 aho bamaze kwinjira i Rwamagana. Bashyizemo ikinyuranyo cy’iminota ine n’amasegonda 40 hagati yabo n’igikundi.

–  Ku mihanda y’i Rwamagana, abafana ni benshi bategereje kwakira amagare

Ukinjira mu Ntara y’Iburasirazuba mu Karere ka Rwamagana, abafana benshi biganjemo abanyeshuri bo mu Rwunge rw’Amashuri rwa Nyagasambu bari ku mihanda aho bategereje kwakira amagare.

Aba banyeshuri bafite morali ndetse baragaragaza akanyamuneza kenshi mbere y’uko abasiganwa batambuka.

– AMANOTA YA SPRINT YA MBERE

10:30 Amanota ya mbere ya Sprint atangiwe mu Kabuga ku kilometero cya 44,8.

Uwa mbere ni Sabbahi ukurikiwe na Maatougui mu gihe A. Stockman ari uwa gatatu.

– 10:27 Abakinnyi bane bayoboye isiganwa bamaze gukora ibilometero 43. Bashyizemo ikinyuranyo cy’iminota ine n’amasegonda 30.

Impuzandengo y’umuvuduko ubu ni 40,5 km/h.

10:19 Ikinyuranyo cy’ibihe hagati y’abakinnyi bari imbere n’igikundi kimaze kugabanuka kiba iminota ine n’amasegonda 25.

10:08 Igikundi cyasizwe iminota ine n’amasegonda 40 n’abakinnyi bane bari imbere bo bamaze gukora ibilometero 29.

10:05 A. Stockman na Maatougui bashyikiriye Hayter na Sabbahi bari imbere. Kuri ubu ni abakinnyi bane bayoboye isiganwa nyuma y’ibilometero 27.

09:56 Igikundi cyasizwe iminota ine n’amasegonda 40 nyuma y’ibilometero 22 bimaze gukorwa.

– AMANOTA Y’AGASOZI KA MBERE

09:55 Amanota y’agasozi ka mbere atangiwe Kibagabaga ku kilometero cya 20,2 yegukanywe na Sabbahi akurikiwe na Hayter.

– 09:47 Hayter na Sabbahi bamaze kugenda ibilometero 17.

Kuri ubu basize Maatougui na Lagab amasegonda 50 mu gihe igikundi cyasizwe iminota ibiri n’amasegonda 50.

09:42 Igikundi gitangiye kwanikirwa

Ku bilometero 11 bimaze gukorwa, igikundi cyasizwe umunota umwe n’amasegonda 45.

Maatougui wa Maroc na Lagab wa Algeria bakurikiye Hayter na Sbbahi ariko basizwe amasegonda 50.

– 09:35 Hayter na Sabbahi bayoboye isiganwa

Abakinnyi babiri: Hayter wa GBR na Sabbahi wa Maroc ni bo bari imbere nyuma y’ibilometero umunani bimaze gukorwa.

Igikundi cyasizwe amasegonda 40.

09:29 Abakinnyi ba mbere bamaze gukora ibilometero bine

Igikundi kibashije kugarura abakinnyi batatu bari bacomotse nubwo hari n’abandi bakomeje kubigerageza.

– 09:26 Gucomoka bitangiye kare!

Abakinnyi babiri bacomotse mu gikundi ndetse bagisize metero 100.

– 09:23 Isiganwa nyakuri riratangiye

Abakinnyi b’imbere bageze mu Gatsata ahatangiye kubarirwa ibihe. Ubu bagiye gukora ibilometero 148,3 bisorezwa kuri Dereva Hotel i Rwamagana.

– Andi mafoto ya mbere y’uko abakinnyi bahaguruka

–  Cogebanque igenda irushaho kwereka abaturarwanda uko bagera ku nzozi zabo mu by’imari

Banki Nyarwanda y’Ubucuruzi, Cogebanque imaze kuba ubukombe mu gushyigikira umukino w’amagare. Muri uyu mwaka Cogebanque yiteguye kugeza abaturarwanda ku nzozi zabo mu by’imari binyuze muri serivisi nziza.

Aho amagare azanyura hose, abaturage bashobora gufunguza konti, gukoresha ikoranabuhanga mu kuyigeraho, kugana aba-agents ndetse n’izindi serivisi zabafasha kuzigama no kubona inguzanyo ziri mu bwoko butandukanye!

Ukeneye serivisi zitandukanye za Cogebanque agana ishami ryayo, umu-agent wayo cyangwa agahamagara umurongo utishyurwa wa 5050.

Kuva Cogebanque yakwemererwa gukorera mu Rwanda mu 1999 imaze kuhagira amashami 28 ayifasha kugeza serivisi ku bayigana. Ifite ATM 36, aba-agents barenga 650 bafasha abayigana gufunguza konti, kubitsa no kubikuza.

Banatanga izindi serivisi zirimo izifashisha ikoranabuhanga binyuze muri Internet Banking, Mobile Banking (ukoresheje telefoni kuri *505# na Mobile App ya “Coge mBank”), Ikarita ya Smart cash ndetse n’amakarita ya MasterCard (Debit, Credit na Prepaid) yifashishwa mu kwishyura no kubikuza ahantu harenga miliyoni 36 ku Isi yose.

Cogebanque iri mu baterankunga b'imena ba Tour du Rwanda

– 09:00 Isiganwa riratangiye

Isiganwa ryerekeza i Rwamagana riratangijwe. Abakinnyi bagiye kubanza gukora ibilometero icyenda mbere y’uko bagera ahatangira kubarwa ibihe.

Urashaka kumenya buri kimwe cyose kibera muri uyu muhanda ? Ntucikwe, IGIHE irahari kubera wowe!

– Icyizere ni cyose ku Banyarwanda

Kapiteni wa Benediction Ignite, Byukusenge Patrick, yizeye ko bashobora kwitwara neza uyu mwaka nyuma y’imyaka itatu nta Munyarwanda utwara etape muri Tour du Rwanda.

Yagize ati "Ndakeka nta kibazo dufite mbere y’uko dutangira isiganwa. Ikipe yacu uyu mwaka turacyeka tutameze nk’umwaka ushize, twatiroje bihagije, natwe turakomeye ku buryo twatwara etape cyangwa isiganwa. Kuba Areruya adahari ntabwo twabyishimira kuko ni umuyobozi wacu. Kuba yarahuye n’ikibazo cya COVID -19 nk’umutoza yabivuze, urumva nta kibazo kirimo kuko Bosco [Nsengimana arazamuka], nanjye ndazamuka ndetse na Manizabayo Eric [Karadiyo]. Mu ikipe yanjye, Mike, Rugamba, abakinnyi bose barakomeye kandi barazamuka.

– Amakipe aritegura guhaguruka

Abakinnyi batangiye kwegera ku murongo aho isiganwa riza guhagurukira hano kuri Stade Amahoro.

Saa Tatu zuzuye ni bwo isiganwa ritangira. Abakinnyi barabanza gukora intera y’ibilometero icyenda, ibihe biratangira kubarwa bageze kuri sitasiyo SP basohoka mu Mujyi wa Kigali.

Alexandre Geniz yerekeje i Rwamagana yambaye umwenda w’umuhondo

Umufaransa Alexandre Geniez ukinira TotalEnergies ni we ugiye i Rwamagana yambaye umwenda w’umuhondo nyuma yo kuba uwa mbere muri prologue y’ibilometero 4,0 yakinwe ku Cyumweru.

Umunyarwanda waje hafi ku munsi wa mbere ni Uhiriwe Byiza Renus wabaye uwa 25.

I Rwamagana ndetse no mu bice bya Kayonza hakomoka abakinnyi benshi b’umukino w’amagare mu Rwanda barimo n’abari gukina isiganwa ry’uyu mwaka. Nta gushidikanya ko abahatuye baza kwishimira kubona bamwe mu bana babo nka Muhoza Eric bitwara neza.

Inzira z’agace ka kabiri ka Tour du Rwanda 2022

Amahoro Stadium-Airtel- Chez Lando- Gishushu-Kbc Roundabout-Kimicanga-Junction Cadilac-Poid Lourds-Kinamba – Yamaha - Traffic Police Hq – Nyabugogo – Gatsata –Karuruma Nyacyonga –Gasanze – Batsinda – Kagugu - Mukabuka Ka Nyarutarama- Kibagabaga – Kimironko - Zindiro- Free Trade Economic Zone - Kuri 15 - Murindi – Inyange Industrie – Masaka Hospital- Kabuga- Rugende- Nyagasambu- Ntunga- Rwamagana- Poid Lourds(Rwamagana)- Sp Rwamagana-Dereva Hote.

Circuit Rwamagana: Dereva Hotel-Rwamagana Ville- Byimana-Poid Lourds- Dereva Hotel(10laps)

–  08:28 Abakinnyi bamaze kugera i Remera

Abakinnyi b’amakipe atandukanye bose bamaze kugera kuri Stade Amahoro aho isiganwa riza guhagurukira mu minota 30 iri imbere.

Tubahaye ikaze na none mu isiganwa mpuzamahanga rizenguruka u Rwanda mu mukino wo gusiganwa ku magare, ryakomeje kuri uyu wa Mbere hakinwa umunsi waryo wa kabiri, mu gace gahaguruka i Kigali kuri Stade Amahoro kerekeza mu Karere ka Rwamagana, ku ntera y’ibilometero 148,3.

• Etape 2: Kigali (Stade Amahoro) – Rwamagana (kuri Dereva Hotel)
• Intera: Ibilometero 148,3.
• Isaha yo guhaguruka: 09:00
• Isaha yo gusoza: Hagati ya saa 12:42 na 12:51.

Dukomeje Icyumweru cy’ibirori by’umukino wo gusiganwa ku magare mu Rwanda kandi twongeye kubifuriza kuryoherwa n’iyi minsi umunani y’isiganwa mpuzamahanga rizenguruka u Rwanda ‘Tour du Rwanda’ riri gukinwa ku nshuro ya 14.

Tour du Rwanda nicyo gikorwa cy’imikino cyonyine kigera mu Ntara zose z’u Rwanda kandi gikurikiranwa n’Abanyarwanda benshi badasabwe ikiguzi na gito, muri make ni ku buntu.

Amafoto: Igirubuntu Darcy & Yuhi Augustin

Video: Amahoro Pacifique