Imodoka 16 zizahatana muri ‘Huye Rally 2026’

0 14-10-2026 - saa 14:49, IGIHE

Isiganwa ngarukamwaka ry’imodoka rya “Huye Rally” rigiye kongera guhuriza mu turere twa Huye na Gisagara abapilote b’Abanyarwanda n’abaturutse muri Uganda, aho imodoka 16 ari zo ziri ku rutonde rw’abitezwe muri iri rushanwa rizaba tariki 16-18 Ukwakira 2026.

Huye Rally ni isiganwa rya gatanu ku ngengabihe ya Shampiyona y’u Rwanda yo gusiganwa mu modoka muri uyu mwaka, aho izaba ifite umwihariko kuko ishobora kugira uruhare rukomeye mu kugena uwegukana Shampiyona.

Mu modoka 16 ziri ku rutonde rw’abiyandikishije, 12 ni iz’abakinnyi b’Abanyarwanda mu gihe enye ari iz’Abanya-Uganda. Subaru Impreza ni yo yiganje kuko izakoreshwa n’amakipe 14 muri 16, mu gihe imwe izaba ari Mitsubishi Evo X indi ikaba Peugeot 106.

Umwe mu bazaba bahanzwe amaso ni Giancarlo Davite, uri ku mwanya wa mbere muri Shampiyona y’u Rwanda nyuma y’amasiganwa ane amaze gukinwa uyu mwaka.

Davite uzaba yungirijwe na Matteo Davite, bombi bakoresha Mitsubishi Evo X, amaze gukusanya amanota 134, aho arusha Queen Kalimpinya uri ku mwanya wa kabiri amanota 64. Akeneye amanota 10 gusa kugira ngo ahite yemeza ko yegukanye Shampiyona y’u Rwanda ya 2026.

Huye Rally 2026 izatangira ku wa Gatanu, tariki ya 16 Ukwakira, hakinwa agace kagamije kureba uko abasiganwa bahagaze, kazabera mu Mujyi wa Huye guhera Saa Moya z’umugoroba.

Ku wa Gatandatu, tariki ya 17 Ukwakira, abasiganwa bazakomereza mu mihanda ya Kibirizi na Gisagara guhera Saa Sita z’amanywa, mu gihe mu ijoro hazakinwa uduce two mu mihanda ya Rango na Kibirizi.

Ku munsi wa nyuma, ku Cyumweru tariki ya 18 Ukwakira, isiganwa rizakomereza mu mihanda y’i Save mbere y’uko hamenyekana abazaba bitwaye neza muri Huye Rally 2026.

Ubwo iri siganwa riheruka gukinwa mu Ukwakira 2025, ryegukanywe n’Umunyarwanda Christian Kanangire wari wungirijwe na Rutabingwa Fernand muri Subaru Impreza.

Imodoka 16 zizahatana muri “Huye Rally 2026”