Ikipe ya Zamalek SC yo mu Misiri yatangaje ko iteganya kugera mu Rwanda ku wa 13 Ukwakira 2026, igakina umukino uzayihuza na APR FC mu ijonjora rya kabiri rya CAF Champions League.

Nyuma y’uko amakipe yombi yitwaye neza mu ijonjora ry’ibanze rya CAF Champions League, agomba guhura mu mikino ibiri izagena ikipe izajya mu matsinda y’iri rushanwa rihuza amakipe yabaye aya mbere iwayo.

Umuyobozi ushinzwe Umupira w’Amaguru muri Zamalek SC, Abdel Nasser Mohamed, yatangaje ko imyiteguro y’uyu mukino yatangiye, ndetse mu gihe gito bahaguruka mu i Cairo bagana i Kigali.

Ni urugendo bazatangira ku wa 12 Ukwakira, bakagera ku Kibuga Mpuzamahanga cy’Indege cya Kigali, mu gitondo cyo ku wa 13 Ukwakira 2026.

Ni mu gihe umukino ubanza mu ijonjora rya kabiri ry’iri rushanwa uzabera kuri Stade Amahoro, ku wa Gatatu, tariki ya 16 Ukwakira 2026. Umukino wo kwishura uzabera i Cairo ku wa 24 Ukwakira.

Ikipe y’Ingabo z’u Rwanda na yo yatangiye kwitegura uyu mukino, dore ko abakinnyi bayo batahagarariye ibihugu byabo mu mikino yo gushaka itike yo kujya mu Gikombe cya Afurika cya 2027, bari gukorera imyitozo i Shyorongi.

Mbere yo gukina na Zamalek SC, APR FC ifite umikino ya Shampiyona y’u Rwanda uzayibera igipimo cyiza, uzayihuza na Al Hilal SC yo muri Sudani ku wa 10 Ukwakira 2026.

APR FC yasezereye Les Aigle du Congo yo muri Repubulika Iharanira Demokarsi ya Congo (RDC) mu ijonjora rya mbere, mu gihe Zamalek SC yasezereye AS Port yo muri Djibouti.

Zamalek SC ihanze amaso umukino ukomeye uzayihuza na APR FC mu ijonjora rya kabiri rya CAF Champions League