Rayon Sports yatomboye Panthère Sportive du Ndé yo muri Cameroun mu ijonjora rya mbere rya CAF Confederation Cup ya 2026/27.

Tombola y’iri rushanwa Nyafurika yabereye ku cyicaro gikuru cy’Impuzamashyirahamwe y’Umupira w’Amaguru muri Afurika (CAF) i Cairo mu Misiri, kuri uyu wa Kane, tariki ya 6 Kanama 2026.

Rayon Sports izahagararira u Rwanda muri iri rushanwa rihuza amakipe yatwaye ibikombe iwayo, yatomboye kuzahura na Panthère Sportive du Ndé.

Umukino ubanza uzabera muri Cameroun hagati ya tariki ya 4 n’iya 6 Nzeri 2026, mu gihe uwo kwishyura uteganyijwe kubera i Kigali hagati ya tariki ya 11 n’iya 13 Nzeri 2026.

Iyi mikino izaba ari iyo kongera guhura ku makipe yombi kuko Rayon Sports na Panthère Sportive du Ndé zaherukaga uhura mu ijonjora ry’ibanze rya CAF Confederation Cup mu 2015.

Icyo gihe, Gikundiro yatsinze umukino ubanza wabereye i Douala ku gitego 1-0 cyatsinzwe na Léo Uwambajimana, mbere yo kongera gutsindira i Kigali igitego 1-0 cya Isaac Muganza.

Panthère Sportive du Ndé ni ikipe ibarizwa mu Mujyi wa Bangangté, yashinzwe mu 1952.

Yegukanye igikombe cy’igihugu muri Cameroun inshuro eshatu zirimo icyo mu 2025, kikaba ari na cyo cyayihesheje kongera gusohokera iki gihugu mu marushanwa Nyafurika.

Rayon Sports igiye gukina iyi mikino iri mu bihe byiza, nyuma yo kugera ku mukino wa nyuma wa CECAFA Kagame Cup 2026, aho izakina na Gor Mahia ku wa Gatanu.

Ikipe izakomeza hagati ya Rayon Sports na Panthère Sportive du Ndé izahura n’izaba yakomeje hagati ya Atomic Ngomé yo mu Birwa bya Comores na African Black Bulls yo muri Mozambique mu ijonjora rya kabiri rizakinwa mu Ukwakira.

Rayon Sports izahera kuri Panthère Sportive du Ndé mu ijonjora rya mbere rya CAF Confederation Cup

Gikundiro igiye kongera kwisobanura na Panthère Sportive du Ndé yasezereye mu 2015