Umutoza wa Arsenal Mikel Arteta, yemeye kuyongerera amasezerano akageza mu 2029, dore ko ari mu mwaka wa nyuma w’amasezerano ye. Bitegenyijwe ko azongererwa n’umushahara ukava kuri miliyoni 10 y’Amapawundi yahabwaga.

Mu 2024 ni bwo Arteta yongereye amasezerano y’imyaka itatu, yatumye agomba kugeza mu 2027 akiri muri iyi kipe yo mu Cyiciro cya Mbere mu Bwongereza.

Mu gihe ari mu mwaka we wa nyuma muri iyi kipe, ibinyamakuru byo mu Bwongereza byatangaje ko hashize amezi menshi aganirizwa ku kongera amasezerano.

Nyuma y’ibiganiro bimaze igihe kirekire, uyu mugabo w’imyaka 44 yemeye kongera amasezerano agakomeza kuyitoza.

Mu masezerano mashya ye azongererwa umushahara yahabwa, uve kuri miliyoni 10 y’Amapawundi [19.728.740.000 Frw] yahabwaga ku mwaka, n’uduhimbazamushyi twa miliyoni 5 y’Amapawundi [9.864.370.000 Frw].

Mu cyumweru gishize Arteta yaganiriye n’itangazamakuru, aca amarenga ko azaguma muri iyi kipe. Yagize ati “Abafana ntibagire impungenge kuko nanjye ndashaka kuguma hano. Ndishimye kandi nkunda gukorana n’abo turi kumwe ubu.”

Uyu Munya-Espagne wageze muri iyi kipe mu 2019, yafashije Arsenal kwegukana FA Cup akiyigeramo mu 2020, FA Community Shield mu 2020, 2023 na 2026, mbere y’urugamba rutoroshye rwayihesheje Igikombe cya Shampiyona y’u Bwongereza, Premier League, nyuma y’imyaka 22.

Kuva yayigeramo amaze gukina imikino 360, akaba yaratsinzemo 224, anganya 60, mu gihe iyo yatsinzwe ari 76.

Mikel Arteta yemeye kongera amasezerano muri Arsenal azamugeza mu 2026