Uburyo Repubulika Iharanira Demokarasi ya Congo (RDC) yabonyemo itike y’Igikombe cy’Isi byongeye kugarukwaho, aho kuri ubu byagaragajwe ko yakinishije umukinnyi utemerewe gukina umukino wayihesheje itike, ndetse na FIFA ikirengagiza ibi binyuranyije n’amategeko.

RDC yasezereye Nigeria mu mikino ya kamarampaka yo gushaka itike y’Igikombe cy’Isi cya 2026 cyabereye muri Leta Zunze Ubumwe za Amerika, Mexique na Canada.

Umukino ubanza amakipe yombi yanganyije igitego 1-1, uwo kwishyura RDC itsinda kuri penaliti 4-3, igera ku mukino wa nyuma yatsindiyeho Jamaica igitego 1-0.

Mbere y’uyu mukino mu Ukuboza 2025, Ishyirahamwe ry’Umupira w’Amaguru muri Nigeria (NFF), ryatanze ikirego mu Ishyirahamwe rya Ruhago ku Isi (FIFA), rirega RDC yakinishije umunyezamu Lionel Mpasi atabyemerewe, ikanarenzaho kuyishima hejuru.

Gusa RDC yakomeje guhakana ibi birego kugeza yitabiriye iri rushanwa, none ubu ikinyamakuru The New York Times cyanditse ko cyabonye inyadiko zigaragaza ko iki gihugu cyakingiwe ikibaba n’urwego ruyobora siporo ku Isi, kugira ngo kijye mu Gikombe cy’Isi cyabaye muri Kamena na Nyakanga 2026.

Cyagize kiti “FIFA yemereye umukinnyi n’ikipe gukomeza urugendo rwabo kugeza batsinze Jamaica, babona itike yo kwitabira irushanwa, kandi yari yarasuzumye neza ikirego cya Nigeria.”

“Icyo gihe mu isuzuma n’iperereza yakoze yasanze Lionel Mpasi ataruzuza ibyangombwa bimwemerera kuba yakinira RDC, kuko yari yarakiniye Ikipe y’Abakiri bato y’u Bufaransa.”

FIFA yahisemo kwanga ikirego cya Nigeria ishingiye ku kuba yaragitanze itinze.

Nubwo FIFA yanze kurenganura Nigeria, biri gufatwa nk’aho yabikoze nkana, kuko mu 2016 yambuye itike u Bugereki bwakinishije umukinnyi wari warakiniye Australia, iha intsinzi y’ibitego 3-0 Turikiya yari yasezerewe.

Nyuma y’imyaka ibiri gusa yahanishije Bolivia guterwa mpaga mu mikino ibiri yo gushaka itike y’Igikombe cy’Isi cya 2018, kuko yari yarayikinishijemo umukinnyi wakiniye Paraguay.

Kurengana kwa Nigeria kwahesheje RDC itike yo gusubira mu Gikombe cy’Isi yaherukaga gukina mu 1974, inagarukira muri 1/16 isezerewe n’Ikipe y’Igihugu y’u Bwongereza.

RDC yakingiwe ikibaba na FIFA yitabira Igikombe cy'Isi