Guverinoma n’Ishyirahamwe ry’Umupira w’Amaguru muri Ethiopia (EFF), byatanze ubusabe mu Ishirahamwe rya Ruhago muri Afurika (CAF), bugaragaza ko bwifuza kwakira Igikombe cya Afurika cya 2028.

Ethiopia ni kimwe mu bihugu byo muri Afurika cyakiriye Igikombe cya Afurika, kuko cyabikoze mu 1962 buranagitwara, bucyakira mu 1968, no mu 1976. Kuva icyo gihe iri rushanwa ryari ritarongera gukinirwa mu Burasirazuba bwa Afurika.

Ku wa Mbere, tariki ya 24 Kanama 2026, Ethiopia yemeje ko yongeye kwifuza kwakira iri rushanwa, ndetse yamaze gutanga n’ubusabe bwayo muri CAF, inerekana ko yiteguye.

Iki gihugu kirifuza kwakira irusahanwa rizakinwa mu 2028, nyuma y’irya 2027 rizabera muri Kenya, Tanzania na Uganda.

Ibindi bihugu byifuza kwakira Igikombe cya Afurika, ni Guinée yagaragarije CAF ko ishaka andi mahirwe yo kucyakira mu 2032 cyangwa 2036, nyuma yo kuyahabwa mu 2025 ariko amahirwe ikayatera inyoni kubera kutubakira igihe ibikorwaremezo, kikimurirwa muri Maroc.

Gusa ihanganye na Mali, Burkina Faso na Niger bishaka kwiteranya bikakira irushanwa rya 2032, na Sénégal irishaka yonyine. Libya na yo irateganya gusaba kwakira amarushanwa y’Igikombe cya Afurika ya 2028, 2032 cyangwa 2036.

Nyuma y’irushanwa rizaba mu 2027, Igikombe cya Afurika kizajya kiba buri myaka ine kuva mu 2028. Kuva mu 1968 cyabaga rimwe mu myaka ibiri, gusa mu 2012 na 2013 cyabaye mu mwaka umwe.

Ethiopia irifuza kwakira Igikombe cya Afurika cya 2028