APR FC izerekeza mu Misiri naho Rayon Sports ijye muri Mozambique, mu mikino ibiri y’ijonjora rya kabiri ry’amarushanwa Nyafurika ahuza amakipe, ari na ryo ribanziriza icyiciro cy’amatsinda.

Ikipe y’Ingabo z’u Rwanda ihagarariye igihugu muri CAF Champions League, yarenze ijonjora rya mbere ku wa Gatanu itsinze FC Les Aigles du Congo yo muri Repubulika Iharanira Demokarasi ya Congo ibitego 3-1 mu mikino ibiri.

Ni mu gihe Gikundiro yo yakomeje muri CAF Confederation ku wa Gatandatu nyuma yo kunganya na Panthère Sportive du Ndé yo muri Cameroun ubusa ku busa, ikayisezerera ku itegeko ry’igitego cyo hanze. Amakipe yombi yari yanganyije igitego 1-1 mu mukino ubanza wabereye i Yaoundé.

Kuri ubu, mu ijonjora rya kabiri ari na ryo ribanziriza amatsinda rizakinwa tariki 16-18 na 23-25 Ukwakira 2026, APR FC izajya mu Misiri mu gihe Rayon Sports izerekeza muri Mozambique.

APR FC yakomeje nyuma yo gutsinda ibitego 3-0 mu mukino wo kwishyura

Rayon Sports yakomeje kubera igitego cyo hanze yatsindiye muri Cameroun

APR FC izahura na Zamalek SC

Ku nshuro ya kane yikurikiranya, kuva mu 2023, APR izahura n’ikipe yo mu Misiri aho kuri iyi nshuro izisobanura na Zamalek SC yanyagiye AS Port yo muri Djibouti ibitego 4-0 ku wa Gatandatu, ikayisezerera ku bitego 6-1.

Ubwo amakipe yombi aheruka guhura mu 2004, APR FC yasezereye Zamalek SC iyitsinze ibitego 6-4 (2-3, 4-1) mu ijonjora rya kabiri rya CAF Champions League.

Kugeza ubu nta kipe yo mu Rwanda irakina amatsinda y’iri rushanwa rihuza amakipe yabaye aya mbere iwayo ku Mugabane wa Afurika.

Kuva mu 2023, APR yagiye ihura n’ikipe yo mu Misiri mu ijonjora rya mbere cyangwa irya kabiri rya CAF Champions League, aho muri izo nshuro zose yasezerewe na Pyramids FC yatwaye iri rushanwa Nyafurika mu 2024/25.

Zamalek SC yegukanye Shampiyona ya Misiri iheruka, ni imwe mu makipe y’ubukombe muri Afurika aho yatwaye CAF Champions League inshuro eshanu [iheruka iya 2002], CAF Confederation Cup inshuro ebyiri [iheruka iya 2024] na CAF Super Cup eshanu [iheruka iya 2024].

Zamalek SC izahura na APR FC nyuma yo gusezerera AS Port yo muri Djibouti ku giteranyo cy'ibitego 6-1

Rayon Sports yasubira mu matsinda ivuye i Maputo

Mu ijonjora ritaha rya CAF Confederation Cup, Rayon Sports izahura na FC Black Bulls yo muri Mozambique, yo yasezereye Atomic Ngomé yo mu Birwa bya Comores ku gitego 1-0 nubwo amakipe yombi yanganyije ubusa ku busa mu mukino wo kwishyura wabereye i Maputo.

Rayon Sports yaherukaga kurenga ijonjora rimwe yakinnye mu marushanwa Nyafurika mu 2017/18 ari na bwo yarenze amatsinda ya CAF Confederation Cup ikaviramo muri ¼ isezerewe na Enyimba SC yo muri Nigeria.

Kugira ngo igere muri icyo cyiciro cy’amatsinda ya CAF Confederation Cup, yari yabanje gusezerera Costa do Sol yo muri Mozambique mu cyiciro cya “play-offs”.

Mu mukino ubanza wabereye kuri Kigali Pelé Stadium, Gikundiro yatsinze ibitego 3-0 mu gihe yatsindiwe 2-0 i Maputo, ikomeza ku giteranyo cy’ibitego 3-2.

Black Bulls ni yo izahura na Rayon Sports mu ijonjora ribanziriza amatsinda