Abakinnyi batanu bari bahagarariye u Rwanda mu irushanwa Nyafurika ry’irushanwa ry’umupira w’amaguru ukinwa hifashishijwe ikoranabuhanga ‘eSports’, basezerewe ku munsi wa mbere batarenze umutaru.

Ni irushanwa riri kubera mu Rwanda ku nshuro ya kabiri, kuva tariki ya 12 na 13 Nzeri 2026, muri BK Arena. Ryitabiriwe n’ibihugu 17 byo muri Afurika kongeraho u Buhinde na bwo bwaritumiwemo.

Ibindi bihugu ni Afurika y’Epfo, Misiri, Somalia, Kenya, Repubulika Iharanira Demokarasi ya Congo, Nigeria, Algeria, Tanzania, Cameroun, Uganda, Ghana, Ibirwa bya Comores, Côte d’Ivoire, Maroc, Madagascar, Nigeria n’u Rwanda.

Iri rushanwa riba ryahujwe n’inama mpuzamahanga yiga ku ishoramari rya siporo ya ’Sportsbiz Africa Forum’, riri mu byiciro bibiri.

Kimwe ni icy’abakinira kuri telefone ‘eFootball Mobile’, ikindi kikaba icy’abifashisha udukoresho twagenewe imikino yo ku ikoranabuhanga by’umwihariko umupira w’amaguru tuzwi nka ‘manette’, bagakina ‘EA Sports FC 26’.

Abakinnye ‘eFootball Mobile’ bari umunani, ndetse bakinnye bose basoza irushanwa. Aha hari hahatanyemo Umunyarwanda umwe, ari na we wahize abandi mu Rwanda, Munezero Olivier Hugue.

Uyu mukinnyi wari witabiriye iri rushanwa bwa mbere ntabwo yagize intangiriro nziza kuko yavuyemo rugikubita nyuma yo gusoreza ku mwanya wa nyuma n’amanota ane gusa mu mikino irindwi yakinnye. Yatsinze umukino umwe, anganya undi, atsindwa itanu.

Iki cyiciro cyegukanywe n’Umunya-Maroc, Anass Moussa, wakinishije FC Barcelone, atsinda Umunya-Madagascar, Sedra Nirina, wakinishije Arsenal mu mikino ine bakinnye.

Gutsinda uyu mukino byahise bimuhesha kwegukana 5000$ (7.364.860 Frw).

Icyiciro cy’abakina ‘EA Sports FC 26’ hakinnye abakinnyi 32 barimo Abanyarwanda bane barimo Nyamwasa Praise Steven wakinnye irushanwa riheruka, ari na we wa mbere mu gihugu kugeza ubu. Abandi ni Samy, Tresol na Franklin.

Aba bose nta n’umwe warenze ⅛, bahise basezererwa mu irushanwa, dore ko ari ubwa mbere bari barikinnye.

Umunya-Afurika y’Epfo, Zaid April, ni umwe mu bahabwa amahirwe muri iki cyiciro, akaba ari na we waryegukanye mu mwaka ushize atsinze Moaaz Ahmed wo mu Misiri uri mu irushanwa.

Umukinnyi uhiga abandi mu mikino ya nyuma iteganyijwe ku Cyumweru, tariki ya 13 Nzeri 2026, azahabwa ibihumbi 10$ (14.729.720 Frw].

Abakinnyi umunani ni bo bahatanye muri 'eFootball Mobile'

Aho abakinnyi bakinira horohereza n'abafana kureba umukino

Abafana bishimiye iri rushanwa ridasanzwe mu Rwanda

Munezero Olivier Hugue yabaye uwa nyuma mu cyiciro cya 'eFootball Mobile'

Hannington wo muri Kenya yasezerewe muri 1/2

Umunya-Madagascar, Sedra Nirina, yatsindiwe ku mukino wa nyuma

Imikino iba iri kuba imbonankubone