CAN 2021: Algérie yasezerewe nta mukino itsinze; uko amakipe azahura muri 1/8

0 21-01-2022 - saa 09:09, Bukuru JC

Ikipe y’Igihugu ya Algérie ifite Igikombe cya Afurika giheruka yasezerewe mu irushanwa riri kubera muri Cameroun nyuma yo gutsindwa na Côte d’Ivoire ibitego 3-1 mu mukino usoza iyo mu Itsinda F wabereye i Douala ku wa Kane.

Algérie yari ifite inota rimwe ku mwanya wa nyuma, yasabwaga gutsinda uyu mukino w’umunsi wa gatatu kugira ngo yizere gukomeza muri 1/8 cy’iri rushanwa yaherukaga kwegukana mu 2019.

Icyizere cyayo cyatangiye kugabanyuka mu gice cya mbere cyarangiye Côte d’Ivoire imaze gutsinda ibitego 2-0 byinjijwe na Franke Kessie ndetse na Ibrahim Sangaré ku munota wa 22 n’uwa 29.

Hashize iminota icyenda amakipe yombi avuye kuruhuka, Nicolas Pépé yatsinze igitego cya gatatu ku ruhande rwa Côte d’Ivoire mu gihe Kapiteni wa Algérie, Riyad Mahrez, yahushije penaliti ku munota wa 60.

Igitego kimwe rukumbi Algérie yabonye muri uyu mukino cyinjijwe na Sofiane Bendebka ku munota wa 73, ariko nticyari gihagije ku buryo cyari gutuma idasezererwa.

Ikipe y’umutoza Djamel Belmadi yasezerewe mu gihe yinjiye mu irushanwa ry’uyu mwaka imaze imikino 35 idatsindwa ndetse yahabwaga amahirwe yo kwisubiza igikombe.

Mu mikino ibiri yabanje, yanganyije na Sierra Leone ubusa ku busa mbere y’uko itsindwa na Guinée Equatoriale igitego 1-0.

Mu yindi mikino yabaye ku wa Kane, Guinée Equatoriale yazamutse nk’ikipe ya kabiri mu Itsinda E nyuma yo gutsinda Sierra Leone igitego 1-0 mu gihe Tunisia yazamutse nk’ikipe ya gatatu yitwaye neza mu Itsinda F ubwo yari imaze gutsindwa na Gambia igitego 1-0.

Tunisia yakinnye uyu mukino idafite abakinnyi 12 barwaye COVID-19. Undi mukino wabaye mu Itsinda F ni uwo Mali yatsinzemo Mauritanie ibitego 2-0.

Uko ibihugu bizahura muri 1/8:

Ku Cyumweru, tariki ya 23 Mutarama 2022