Ikipe ya RSSB Tigers yasoje ku mwanya wa kane mu irushanwa mpuzamahanga rya “FIBA Intercontinental Cup 2026”, nyuma yo gutsindwa na Club Atlético Boca Juniors yo muri Argentine mu mukino wo guhatanira umwanya wa gatatu.

Uyu mukino wabaye kuri iki Cyumweru, tariki ya 27 Nzeri 2026, i Bejing mu Bushinwa, aho RSSB Tigers yari ihagarariye Afurika yashakaga kwandika amateka ku nshuro yayo ya mbere muri iri rushanwa, ariko itsindwa na Boca Juniors amanota 93-62.

RSSB Tigers yari yinjiye muri uyu mukino ifite intego yo gusoreza iri rushanwa ku mwanya wa gatatu, nyuma yo kuba ikipe ya kabiri yo muri Afurika igeze muri kimwe cya kabiri cya FIBA Intercontinental Cup.

Iyi kipe yageze muri ½ itsinzwe na NBA G League United yo muri Leta Zunze Ubumwe za Amerika amanota 114-95.

Mu mukino wa nyuma wo guhatanira umwanya wa gatatu, Boca Juniors yatangiye neza, ikoresha neza amahirwe yabonaga ndetse irangiza agace ka mbere iyoboye ku manota 26-18.

RSSB Tigers yagerageje gusubira mu mukino mu gace ka kabiri, ikina neza cyane cyane mu busatirizi, ariko ikipe yo muri Argentine ikomeza kugumana ikinyuranyo cyayo. Igice cya mbere cyarangiye Boca Juniors iyoboye ku manota 52-29.

Mu gace ka gatatu, RSSB Tigers yongeye kotsa igitutu Abanya-Argentine, ariko Boca Juniors ikomeza kugaragaza ubunararibonye, ikomeza kwihagararaho no kongera ikinyuranyo cyayo (75-45) mbere y’agace ka nyuma.

Nubwo RSSB Tigers yakomeje guhatana kugeza ku munota wa nyuma, Boca Juniors yakomeje kuyobora umukino, ibona intsinzi y’amanota 93-62 yayishyize ku mwanya wa gatatu muri FIBA Intercontinental Cup 2026, mu gihe ikipe y’u Rwanda yasoreje ku mwanya wa kane.

Thomas Monacchi wa Boca Juniors ni we watsinze amanota menshi muri uyu mukino (15) naho Antino Jackson Jr na Bizimana Paul batsinda amanota 10 ku ruhande rwa RSSB Tigers yakinnye idafite Craig Randall na Teafale Lenard Jr.

RSSB Tigers yabaye ikipe ya mbere yo mu Rwanda yitabiriye iri rushanwa nyuma y’uko yegukanye igikombe cya BAL 2026.

Umwanya wa gatanu wegukanywe na Beijing Royal Fighters itsinze Shanghai Sharks amanota 101-87 mu gihe igikombe cyegukanywe naNBA G League United yo muri Leta Zunze Ubumwe za Amerika itsinze Rytas Vilnius yo muri Lithuania amanota 89-86.

Mutabazi David agerageza gutsinda amanota mu gihe Valentino Finetti yamuzibiraga

RSSB Tigers yasoreje ku mwanya wa kane

Boca Juniors ni yo yasoje irushanwa ari iya gatatu