Ikipe ya RSSB Tigers ihagarariye u Rwanda muri ‘FIBA Intercontinental Cup 2026’, yageze muri ½ cy’iri rushanwa rihuza amakipe akomeye ku Isi, nyuma yo gusoza imikino y’amatsinda iri ku mwanya wa kabiri mu Itsinda A.

RSSB Tigers yabonye itike yo gukomeza nyuma y’uko Rytas Vilnius yo muri Lithuania itsinze Shanghai Sharks yo mu Bushinwa amanota 107-66 mu mukino usoza imikino y’Itsinda A wabaye kuri uyu wa Kane.

Uyu mukino watumye Rytas Vilnius isoza iri tsinda iri ku mwanya wa mbere, mu gihe RSSB Tigers yari ifite intsinzi imwe n’umukino umwe yatsinzwe.

Iyi kipe y’u Rwanda yatangiye iri rushanwa itsindwa na Rytas Vilnius amanota 107-89, ariko yisubiza ikuzo mu mukino wa kabiri ubwo yatsindaga Shanghai Sharks amanota 117-115 nyuma y’uko yari yabanje kurushwa ikinyuranyo cy’amanota 19.

Muri ½ kizakinwa ku wa Gatandu, tariki ya 26 Nzeri 2026, RSSB Tigers izahura n’ikipe izasoza ari iya mbere mu Itsinda B hagati ya Club Atlético Boca Juniors yo muri Argentine na NBA G League United yo muri Leta Zunze Ubumwe za Amerika, zombi zifitanye umukino ku gicamunsi cyo kuri uyu wa Kane.

RSSB Tigers iri gukina FIBA Intercontinental Cup ku nshuro ya mbere nyuma yo kwegukana igikombe cya Basketball Africa League (BAL) 2026.

Iri rushanwa riri kubera i Beijing mu Bushinwa, ryahuje amakipe atandatu yegukanye ibikombe ku migabane yayo, yongerwamo Shanghai Sharks yitabiriye nk’ikipe yatwaye Shampiyona y’u Bushinwa(CBA) ndetse na Bejing Royal Fighters nk’ikipe yo mu gihugu cyakiriye irushanwa.

RSSB Tigers yageze muri ½ cya FIBA Intercontinental Cup

Iyi kipe ihagarariye Umugabane wa Afurika yazamutse ari iya kabiri mu Itsinda A ndetse izahura n'ikipe ya mbere mu Itsinda B