IGIHE

Mukomereze aho! Minisitiri Mukazayire n’abandi bayobozi banyuzwe n’intsinzi y’Amavubi

0 29-09-2026 - saa 21:55, Iradukunda Olivier

Minisitiri wa Siporo, Nelly Mukazayire, Minisitiri w’Ubutegetsi bw’Igihugu, Habimana Dominique n’abandi bayobozi mu nzego zitandukanye za leta, bashimye ishyaka ry’abakinnyi b’Ikipe y’Igihugu y’u Rwanda ryayihesheje intsinzi ku mukino wa Cap-Vert.

Ikipe y’Igihugu y’u Rwanda, Amavubi, yatsindiye Cap-Vert iwayo ibitego 2-1, iyobora Itsinda K ryo gushaka itike y’Igikombe cya Afurika cya 2027 n’amanota atandatu kuri atandatu.

Uyu mukino wabereye i Praia ku mugoroba wo kuri uyu wa 29 Nzeri, iminsi ine nyuma y’uko Amavubi atsindiye Liberia i Kigali ibitego 3-1, ibyishimo by’Abanyarwanda bikomerezaho.

Nyuma y’umukino abenshi bifashishije imbuga nkoranyambaga, bagaragariza urukundo abakinnyi, abatoza n’abandi bose bafashije u Rwanda kwitwara neza.

Minisitiri wa Siporo Nelly Mukazayire, yahise yandika agira ati “Mwakoze gukotana, mukagaragaza ko muri bato batari gito. Mukomereze aho, murashoboye kandi murashyigikiwe. Mukomezanye ishyaka, ikinyabupfura no kudateshuka ku ntego.”

Minisitiri Mukazayire yabagaragarije ko intego ari Igikombe cya Afurika cya 2027, bityo u Rwanda rugakomeza kwema.

Minisitiri w’Urubyiruko n’Iterambere ry’Ubuhanzi, Dr. Utumatwishima Abdallah, yifashishije amashusho y’igitego cyatsinzwe na Iradukunda Elie Tatou, agira ati “Mvugira uti u Rwanda”.

Minisitiri w’Ububanyi n’Amahanga n’Ubutwererane, Amb. Olivier Nduhungirehe, usanzwe ari umukunzi w’umupira w’Amaguru, yagize ati “Mwakoze cyane, Amavubi kuri iyi ntsinzi yo hanze kuri Cap-Vert.”

Umunyabigwi mu mupira w’amaguru w’u Rwanda, Niyonzima Haruna, waherukaga gukina na Cap-Vert mu 2020, yagize ati “Wakoze cyane gihugu cyanjye, ntewe ishema namwe basore.”

Murangwa Eugene uyobora Ishyirahamwe ry’Abakiniye Ikipe y’Igihugu y’u Rwanda n’abakiyikinira ‘FAPA’, yagize ati “Umusaruro mwiza ku ikipe iheruka mu Gikombe cy’Isi, ya Blue Sharks ya Cap-Vert. Intsinzi ya 2-1 muri kure yo mu rugo n’amanota menshi mu mikino ibiri ya mbere, ntako bisa.”

Minisitiri w’Ubutegetsi bw’Igihugu, Habimana Dominique, yagize ati “Turi Amavubi. Dushimiye cyane Amavubi yacu ku byishimo bakomeje guha Abanyarwanda. Murashoboye mukomereze aho.”

Amavubi yatsinze Cap-Vert ibitego 2-1
Kwamamaza
Kwamamaza

Izindi nkuru wasoma

Ubushobozi buke, isoko rito n’igishoro kinini: Ibikibagamiye abubaka imikino y’ikoranabuhanga
0 0 28-09-2026
Chess: Umukobwa w’imyaka 11 yaciye agahigo ku Isi
0 0 28-09-2026
Golf: Umunya-Afurika y’Epfo yegukanye irushanwa ’Sunshine Tour’ ryabereye bwa mbere i Kigali
0 0 27-09-2026
Minisitiri Mukazayire yerekanye ubuhanga afite mu kwiruka binyuze mu gukina ‘agati’ n’Abanya-Gakenke (Amafoto)
0 0 27-09-2026
Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza