Umuryango World Vision Rwanda wifatanyije n’ibigo by’ishoramari mu Rwanda mu irushanwa ryiswe ‘Friends of World Vision Rwanda Annual Golf Tournament’, ryitezwemo inkunga yo gufasha abana bafite imirire mibi. Uyu muryango ukeneye arenga ibihumbi 500$ yo kubaka igikoni kigezweho.

Ku wa 19 Kanama 2026, ni bwo kuri Kigali Golf Resorts & Villas habereye ikiganiro n’itangazamakuru kuri iri rushanwa rigiye kuba ku nshuro ya mbere, ariko rikazakomeza kuba ngarukamwaka.

Umuyobozi wa World Vision mu Rwanda, Pauline Okumu, yavuze ko nyuma y’uko hahindutse uburyo babonga inkunga yo gufasha imiryango itishoboye, bahisemo kwegera abikorera kugira ngo na bo batange umusanzu wabo.

Ati “Kurwanya imirire mibi ni ikintu kigirwamo uruhare n’abishyize hamwe, yaba leta, abikorera, abafite imishinga y’iterambere n’abaturage bose. Buri wese afite icyo agomba kugira ngo abana bakure bafite imirire myiza.”

Okumu yongeyeho ko hakozwe inyigo y’uko haboneka igikoni cyiza kandi kigezweho, gifite icyumba cyo kuriramo, aho gutunganyiriza amafunguro, akarima k’igikoni karimo imbuto n’imboga.

Kugira ngo kiboneke mu mezi atatu ari imbere, hakenewe byibuze ibihumbi 500$ [736.825.000 Frw]. Amwe muri yo ni azatangwa nk’inkunga kuri iri rushanwa riteganyijwe ku wa Gatandatu, tariki ya 22 Kanama 2026.

Umukozi wa World Vision akaba n’umuyobozi w’iri rushanwa, Keith Bunyenyezi, yavuze ko irushanwa rizakinwa mu buryo bwa ‘stroke play’, harimo abagore n’abagabo.

Irushanwa rizabera kuri Kigali Golf Resorts & Villas

Maria Kaitesi Rutagegwa ushinzwe itangazamakuru muri World Vision ni we watanze gahunda y'irushanwa

Keith Bunyenyezi ni we uzayobora irushanwa rya Friends of World Vision Rwanda Annual Golf Tournament

Umuyobozi wa World Vision mu Rwanda, Pauline Okumu, yavuze ko siporo ari uburyo bushya bwo gukusanya inkunga ifasha abatishoboye

Umuyobozi wa Kigali Golf Resorts & Villas, Jacobus Johannes Visagie, aganira na Keith Bunyenyezi uzayobora irushanwa

Irushanwa rizakusanyirizwamo inkunga izafasha abatishoboye