Umubiligi Remco Evenepoel yegukanye umudali wa Zahabu wa Shampiyona y’Isi mu gusiganwa n’igihe buri mukinnyi ku giti cye (ITT), yandika amateka yo kuba umukinnyi wa mbere wegukanye iri rushanwa inshuro enye zikurikiranya.

Evenepoel yasize abandi mu isiganwa ryabereye mu Mujyi wa Montréal muri Canada kuri iki Cyumweru, tariki ya 20 Nzeri 2026, aho yasoje intera y’ibilometero 38,6 mu minota 44 n’amasegonda 53.

Yasize Umutaliyani Filippo Ganna, wegukanye Shampiyona y’Isi inshuro ebyiri, amurusha amasegonda 57, mu gihe Umufaransa Paul Seixas yatwaye umudali w’Umuringa nyuma yo gusoreza ku mwanya wa gatatu.

Seixas ufite imyaka 19, yegukanye umwanya wa gatatu nyuma y’amezi abiri gusa asoreje ku mwanya wa kane muri Tour de France ye ya mbere. Uyu mukinnyi w’Umufaransa yasize Umunyamerika Brandon McNulty amasegonda 12.

Evenepoel wegukanye imidali ya zahabu mu gusiganwa n’igihe ndetse no mu isiganwa risanzwe ry’amagare mu Mikino Olempike ya Paris 2024, yabaye umukinnyi wa kane mu mateka wegukanye ITT ya Shampiyona y’Isi inshuro enye.

Abandi babikoze ni Umufaransakazi Jeannie Longo, Umusuwisi Fabian Cancellara ndetse n’Umudage Tony Martin, bose bafite imidali ine ya Zahabu ya Shampiyona y’Isi mu gusiganwa n’igihe.

Icyihariye kuri Evenepoel, Cancellara na Tony Martin ni uko kuri ubu banganya imidali irindwi begukanye muri Shampiyona y’Isi.

Iri siganwa ry’uyu mwaka ryabaye ritarimo Tadej Pogačar, Umunya-Slovenia wegukanye Tour de France inshuro eshanu, kuko yakoze impanuka yatumye asoza umwaka w’imikino mbere y’igihe, aho yavunitse igufwa rihuza urutugu n’ukuboko ubwo yari muri Vuelta a España tariki ya 29 Kanama.

Pogačar ni we wari wegukanye Shampiyona y’Isi inshuro ebyiri ziheruka mu isiganwa ry’amagare risanzwe (Road race), ariko kugeza ubu ntarabasha kwegukana isiganwa rya ITT kuko yabaye uwa kabiri inyuma ya Evenepoel mu 2025 i Kigali.

Isiganwa rya ITT ryatangiye gukinwa muri Shampiyona y’Isi y’Amagare mu 1994.

Abakinnyi 10 ba mbere muri ITT ya Shampiyona y’Isi y’Amagare 2026:

1. Remco Evenepoel (u Bubiligi) — 44:53,13
2. Filippo Ganna (u Butaliyani) — +57,31
3. Paul Seixas (u Bufaransa) — +1:13,04
4. Brandon McNulty (Amerika) — +1:25,27
5. Jakob Soderqvist (Suède) — +1:26,18
6. Isaac del Toro (Mexique) — +1:38,83
7. Stefan Kueng (u Busuwisi) — +1:44,44
8. Kasper Asgreen (Danemark) — +1:48,54
9. Daan Hoole (u Buholandi) — +2:02,21
10. Callum Thornley (u Bwongereza) — +2:02,79

Umubiligi Remco Evenepoel ni we wahagarutse nyuma mu isiganwa ry'abagabo kuko ari we waherukaga gukura intsinzi i Kigali mu 2025

Uyu Mubiligi w'imyaka 26 yongeye kugaragaza ko afite ubuhanga bwihariye mu kunyonga igare

Remco Evenepoel agaragaza ko yegukanye ITT ya Shampiyona y'Isi inshuro enye zikurikiranya

Remco (hagati), Filippo Ganna (ibumoso) na Paul Seixas (iburyo)