Umudage Karl Platt usanzwe ukinira Ikipe ya Bulls Bikes ari kumwe n’Umunyarwanda Habimana Jean Eric ukinira ProTouch yo muri Afurika y’Epfo, begukanye irushanwa rya mbere rya Rwandan Epic riri ku rwego mpuzamahanga nyuma yo kwegukana agace ka nyuma kakinwe ku Cyumweru, tariki ya 13 Werurwe 2022.

Karl Platt na Habimana Jean Eric begukanye Agace ka Kane kareshyaga n’ibilometero 63 nyuma yo gukoresha amasaha abiri, iminota 36 n’amasegonda 17.

Habimana Jean Eric yasoje aka Gace ari uwa kabiri inyuma y’Umunya-Kenya Suleiman Kangangi ukinira Giant watanze abandi kuri Palm Beach Hotel, ariko habarwa ibihe byakoreshejwe na Karl Platt utorohewe n’imisozi yo muri Nyabihu na Rubavu kuko yaguye agakomereka ku mavi n’inkokora.

Ibilometero 63 byakozwe ku Cyumweru byatangiye kubarwa abakinnyi bageze mu muhanda w’ibitaka uri mu Bigogwe mu gihe kandi bazamutse muri Gishwati mbere yo kwerekeza ku Kiyaga cya Kivu banyuze i Pfunda.

Karl Platt na Habimana Jean Eric basoje isiganwa bamaze gukoresha amasaha umunani, imonota 22 n’amasegonda 55 ku rutonde rusange, barusha iminota 38 Daniel Gathof na Renay Groustra babaye aba kabiri.

Uyu Mudage w’imyaka 43 wakinaga Rwandan Epic ku nshuro ya mbere kuko atitabiriye iya 2020 yegukanywe na Habimana Jean Eric, yavuze ko yishimiye gusiganwa mu Rwanda ndetse azahagaruka.

Ati “Ryari irushanwa ryiza kandi nagize ibihe byiza mu mihanda twanyuzemo hamwe na Jean Eric. Nishimiye ibihe nagize kuva ngeze hano, ndizera ko nzagaruka kuko hano nahagize inshuti nyinshi.”

Mu cyiciro cy’abagore, Leone Verster na Catherine Colyn bongeye kuba aba mbere bakoresheje amasaha atatu, iminota 54 n’amasegonda umunani naho Umwamikazi Jazilla na Nirere Xaverine bakoresha amasaha atanu, iminota 34 n’amasegonda 22.

Ku rutonde rusange, Leone Verster na Catherine Colyn basoje irushanwa bamaze gukoresha amasaha 12, iminota 39 n’amasegonda 29, barusha hafi amasaha atanu Abanyarwandakazi bari bahanganye muri iki cyiciro.

Mu bakina bavanze (abagabo n’abagore), Jennifer Wagouman na Daniel Klemmer bakoresheje amasaha atanu, iminota 37 n’amasegonda atandatu, byatumye basoza bamaze gukoresha amasaha 17, iminota 43 n’amasegonda 53 ku rutonde rusange.

Uretse aba basiganwaga barushanwa kuva ku wa Kane, ku munsi wa nyuma hitabiriye kandi abakinnyi 11 bashya baturutse mu bihugu bitandukanye. Muri bo, uwa mbere yabaye Jakob Schule wakoresheje amasaha abiri, iminota 57 n’amasegonda 55.

Abandi bakinanye na we ni Reno Ziondato, Evan Meyers, Arthur Franzon, Perden Dorji, Artur Franzon, Alexander Lamberts, Didier, Habiyambere Olivier, Neza Violette, Paulo van der Ven ndetse na Arjan Sleurink.

Iri rushanwa ryasojwe n’Umuyobozi w’Akarere ka Rubavu, Kambogo Ildephonse, witabiriye umuhango wo guhemba abitwaye neza.

Mu baterankunga ba Rwandan Epic 2022 harimo Amstel, Ikigo gishinzwe kumenyekanisha ubukerarugendo bushingiye ku nama mu Rwanda (RCB), Winnaz, Radisson Blu Hotel & Kigali Convention Centre, Trans Link, Qoryx Energy, Peloton de Paris, SunRace n’abandi.

Nyuma y’iri rushanwa, Rwanda Alternative Riding Events (RaR) iritegura, iteganya ko hazaba “Race Around Rwanda” izakinwa tariki ya 19 Werurwe 2022 mu gihe muri Kamena hazaba “Gorilla Gravel” hagati ya tariki ya 9 n’iya 12 Kamena.

Uko abakinnyi bakurikiranye mu Gace ka Kane ka Rwandan Epic 2022:

Abagabo:

1. Karl Platt & Habimana Jean Eric: 2h36’17”
2. Daniel Gathof & Renay Groustra: 2h48’38”
3. Suleiman Kangangi & Mael Desrieux: 2h55’45”
4. Mitch Elliot: 2h58’10”
5. Josh Ibbett & Ruberwa Jean: 2h59’05”
6. Kwizera Elie & Uwitonze Edouard: 3h06’38”
7. Marc Schut & Rhys Manners: 3h13’57”
8. Nduwayo Eric & Nkurunziza Yves: 3h15’44”
9. David Caroll & Niringiyimana Ramadhan: 3h41’40”
10. Ishimwe Jean Claude & Nshutiraguma Kevin: 4h18’56”

Abagore

1. Leone Verster & Catherine Colyn: 3h54’08”
2. Umwamikazi Jazilla & Nirere Xaverine: 5h34’22”

Abakina bavanze

1. Jennifer Wagouman & Daniel Klemmer: 5h37’06”

Uko abakinnyi basoje bakurikirana ku rutonde rusange:

Abagabo:

1. Karl Platt & Habimana Jean Eric: 8h22’55”
2. Daniel Gathof & Renay Groustra: 8h54’50”
3. Suleiman Kangangi & Mael Desrieux: 9h26’46”
4. Josh Ibbett & Ruberwa Jean: 9h57’58”
5. Kwizera Elie & Uwitonze Edouard: 10h53’18”
6. Marc Schut & Rhys Manners: 11h05’52”
7. David Caroll & Niringiyimana Ramadhan: 12h03’41”
8. Nduwayo Eric & Nkurunziza Yves: 12h08’31”

Abagore

1. Leone Verster & Catherine Colyn: 12h39’29”
2. Umwamikazi Jazilla & Nirere Xaverine: 17h47’24”

Abakina bavanze

1. Jennifer Wagouman & Daniel Klemmer: 17h43’53”

Abakinnyi bishyushyaga bagaragaza ubuhanga bafite ku magare

Bamwe mu bakinnyi ba Benediction Ignite bitoza

Micth Elliot aganira na Nkurunziza Yves

Karl Platt yahaye igare rye abana bumva uko ritwara bimera

Bamwe mu baturage bo muri Nyabihu bareba amagare yanyuraga imbere yabo ku muhanda

Yahisemo kuba ahagaritse kudoda kugira ngo abanze arebe abatwaye amagare azamuka mu misozi

Ubwo abakinnyi biteguraga guhaguruka mu Bigogwe

Isiganwa ryatangiye bagendera hamwe

Daniel Gathof asiganwa mu mihanda yo muri Nyabihu

Jakob Schule ni umwe bakinnyi batarushanwa ariko wabaye uwa mbere

Reno Ziondato wabaye uwa kabiri mu bakinnyi batari mu irushanwa

Habimana Jean Eric agenda yunamye mu mahembe y'igare ubwo yishyuhirizaga muri kaburimbo

Leone Verster na Catherine Colyn bamanuka ahazwi nk'i Nyamirambo muri Rubavu

Hakizimana Seth yakinnye wenyine muri iri rushanwa

Nduwayo Eric amanuka muri Nyabihu

Abapakiraga ibirayi bitegereza umukinnyi watambukaga mu muhanda

Hari aho abakinnyi baba bagomba gufata ibirimo amazi yo kunywa

David Caroll ukinira Giant ni umwe mu bakuze bitabiriye Rwandan Epic 2022

Irakoze Neza Violette na we yakinnye ku munsi wa nyuma w'irushanwa

Karl Platt aganira na Simon Hupperetz uri mu bategura Rwandan Epic

Ibihembo byahawe abatsinze muri Rwandan Epic 2022

Didier wabaye karindwi mu bakinnye batarushanwa

Habiyaremye Olivier wakinnye mu batarushanwa akaba uwa munani

Karl Platt yakomeretse ku ivi kubera kugwa

Natete Brian wari 'MC' muri iki gikorwa

Abakomiseri b'irushanwa bareba uko abakinnyi bitwaye

Neza Violette yasoje ari uwa cyenda mu batarushanwaga

Habimana Jean Eric wasoje ari uwa kabiri mu gihe Ikipe ye yabaye iya mbere

Bamwe mu bagize uruhare mu gutuma Rwandan Epic 2022 iba ikarangira neza

Nirere Xaverine agera kuri Palm Beach hasorejwe isiganwa

Jennifer Wagouman na Daniel Klemmer bakina bavanze, basoje isiganwa bafatanye mu ntoki

Jennifer Wagouman na Daniel Klemmer basomanye ubwo bari bamaze gushyikirizwa igihembo cyabo

Leone Verster na Catherine Colyn babaye aba mbere mu bagore

Habimana Jean Eric na Karl Platt begukanye Rwandan Epic 2022 mu bagabo

Karl Platt na Habimana Jean Eric bishimira ibihembo bahawe

Ruberwa Jean-Damascène afata 'selfie' hamwe na Karl Platt na Habimana Jean Eric batwaye Rwandan Epic 2022

Umuyobozi w'Akarere ka Rubavu, Kambogo Ildephonse (hagati) yitabiriye isozwa rya Rwandan Epic 2022

Amafoto: Irakiza Yuhi Augustin