Ingabire Diane ukinira Ikipe ya Benediction Club mu bagore na Nsengiyumva Shemu wa Java-InovoTec mu bagabo, begukanye Umunsi wa Kabiri w’isiganwa ryo Kwibuka [Race to Remember 2026] wakinwe ku Cyumweru abakinnyi bazenguruka mu Mujyi wa Kamembe i Rusizi.

Iri siganwa ryabanjirijwe no gusura Urwibutso rwa Jenoside yakorewe Abatutsi rwa Kamembe, cyitabiriwe n’abayobozi b’Akarere ka Rusizi, aba FERWACY n’amakipe, abakinnyi n’abandi bantu batandukanye.

Mu isiganwa ry’abagabo bazengurutse intera y’ibilometero 6,5 inshuro umunani, hatsinze Nsengiyumva Shemu wa Java-InovoTec Pro Team aho yakoresheje isaha imwe, iminota 29 n’amasegonda 30.

Yakurikiwe na Nkundabera Eric wa Les Amis Sports yamusize iminota itatu n’amasegonda 23 mu gihe Byukusenge Patrick wa Java InovoTec yabaye uwa gatatu anganya ibihe na Nkundabera.

Kwegukana aka Gace ka Kabiri byashimangiye intsinzi ya Shemu muri “Race to Remember 2026” dore ko yari yanatsinze Agace ka Mbere ka “Karongi- Rusizi” kakinwe ku wa Gatandatu.

Mu bagore, Ingabire Diane w’Ikipe ya Benediction Club yegukanye umwanya wa mbere akoresheje isaha, iminota 10 n’amasegonda 57 mu kuzenguruka inshuro eshanu, akurikirwa na Iragena Charlotte wa Ndabaga Women Cycling Team amusize iminota ibiri n’amasegonda atatu mu gihe Byukusenge Mariathe yabaye uwa gatatu.

Mu ngimbi, Race to Remember 2026 yegukanywe na Nkurikiyinka Jackson wa Benediction Club, mu bangavu itwarwa na Masengesho Yvonne wa Ndabaga Women Cycling Team.

Mu bakobwa batarengeje imyaka 23, uwegukanye irushanwa ry’uyu mwaka ni Byukusenge Mariatha wa Sina Cycling Team mu gihe mu bahungu batarengeje iyo myaka ari Tuyizere Hashim wa Team Amani.