Ishami rya Samsung rikora ibikoresho by’ikoranabuhanga, Samsung Electronics, ryatangaje ko mu 2026 rizongera umubare w’ibikoresho rikora bikoresha Gemini AI bikava kuri miliyoni 400 bikagera kuri miliyoni 800 mu 2026.

Umuyobozi Mukuru wa Samsung Electronics, Roh Tae Moon, yabwiye Reuters ko mu 2025 iki kigo cyari kimaze gushyira Gemini AI mu bikoresho byayo bigera kuri miliyoni 400 byiganjemo telefone ngendanwa (smartphones na tablets).

Agaragaza ko Samusang igiye gukuba kabiri uwo mubare no gushyira AI mu bicuruzwa byose, mu mikorere no muri serivisi zayo vuba bishoboka.

Ati “Tuzashyira AI mu bicuruzwa byose, mu mikorere yose no mu serivisi zose vuba bishoboka.”

Iyi gahunda izafasha sosiyete yo muri Leta Zunze Ubumwe za Amerika ya Google, kongera abakoresha Gemini AI, gukomeza guhangana na OpenAI no kwagura isoko ryayo ku Isi.

Samsung ishaka kongera kwigarurira umwanya wa mbere ku isoko rya telephone ngendanwa, aho Apple ari yo iyoboye mu 2025 ndetse no kwirinda guhangana na sosiyete y’Abashinwa ya Huawei mu bikoresho bitandukanye by’ikoranabuhanga birimo telefone, televiziyo n’ibikoresho byo mu rugo.

Roh yizeye ko gukoresha AI bigiye kwihuta, kuko ubushakashatsi bwa Samsung bwerekanye ko kumenyekana kwa Galaxy AI byazamutse bigera kuri 80% ugereranyije na 30% mu mwaka umwe gusa.

Ati“Nubwo ikoranabuhanga rya AI rishobora kugaragara nk’iritizewe muri iki gihe, mu mezi atandatu cyangwa umwaka, iri koranabuhanga rizaba ryarakwirakwiye cyane.”
Abashakashatsi nka Counterpoint na IDC bateganya ko isoko rya telefoni ngendanwa ku Isi rizagabanuka mu 2026, ariko Samsung ikomeje gushora imari mu ikoranabuhanga rya AI no mu gukora telephone zizingwa.

Roh yemeza ko nubwo iri soko rikomeje gukura buhoro, ariko mu myaka ibiri cyangwa itatu iri imbere telefoni zayo zikunjwa zizaba ari rusange ku isoko.

Counterpoint ivuga ko mu gihembwe cya gatatu cya 2025, Samsung yari ifite hafi bibiri bya gatatu by’isoko rya telefoni zizingwa. Ariko kuri ubu ihanganye na Huawei na Apple, zitegerejwe gushyira hanze telefoni zazo zikunjwa bwa mbere muri uyu mwaka.

Samsung Electronics igiye gukuba kabiri ibikoresho bikoresha Gemini AI bigere kuri miliyoni 800 mu 2026