Umubare w’abarimu bo muri kaminuza n’amashuri makuru mu Rwanda bafite impamyabumenyi y’ikirenga ya PhD wazamutse ku buryo bugaragara mu mwaka w’amashuri wa 2024/2025, ariko abagore baracyari bake cyane muri iki cyiciro.

Imibare ya Minisiteri y’Uburezi igaragaza ko abigisha bafite PhD bavuye ku 1.091 mu mwaka w’amashuri wa 2023/2024, bagera ku 1.360 mu 2024/2025. Ni izamuka rya 24,6% mu mwaka umwe.

Muri abo 1.360, abagabo ni 1.144 mu gihe abagore ari 216 gusa. Bivuze ko abagore bangana na 15,9%, naho abagabo bakaba 84,1%.

Nubwo ikinyuranyo hagati y’abagabo n’abagore bafite PhD gikomeje kuba kinini, imibare igaragaza ko umubare w’abagore bafite iyi mpamyabumenyi wagiye uzamuka. Mu 2020/2021 bari 141, bagera ku 162 mu 2021/2022, 179 mu 2022/2023, basubira kuri 169 mu 2023/2024, mbere yo kugera kuri 216 mu 2024/2025.

Mu mwaka umwe gusa, bavuye ku 169 bagera ku 216, biyongeraho 47, ni ukuvuga hafi 28%.

Ku bagabo, abafite PhD bavuye kuri 922 mu 2023/2024 bagera ku 1.144 mu 2024/2025.

Mu myaka itanu, umubare rusange w’abigisha bafite PhD wavuye kuri 976 mu 2020/2021, ugera ku 1.360 mu 2024/2025. Icyakora umugabane w’abagore muri iki cyiciro wahindutse gahoro, uva kuri 14% ugera kuri 15,9% muri icyo gihe.

Abagore na bo baracyari bake mu bigisha muri kaminuza

Ikibazo ntikigarukira gusa ku bafite PhD. Mu 2024/2025, kaminuza n’amashuri makuru yo mu Rwanda zari zifite abarimu 5.463, barimo abagabo 4.283 n’abagore 1.180. Abagore rero bari 21,6% by’abarimu bose bo muri iki cyiciro cy’uburezi, mu gihe abagabo bari 78,4%.

Hari ariko impinduka ugereranyije n’imyaka yashize. Mu 2020/2021, abagore bari 809 mu 4.301 bigishaga muri kaminuza n’amashuri makuru, bangana na 18,8%. Mu 2024/2025 bari bamaze kugera ku 1.180, bangana na 21,6%.

Mu mashuri makuru ya Leta, abarimu bose bari 2.517, barimo abagore 539 cyangwa 21,4%. Mu mashuri makuru yigenga, bari 2.946, abagore ari 641 cyangwa 21,8%.

Abenshi bafite Masters

Raporo igaragaza ko nubwo abafite PhD bari kwiyongera, abarimu benshi muri kaminuza n’amashuri makuru bafite impamyabumenyi ya Masters.

Mu 2024/2025, abarimu 2.935, bangana na 53,7% by’abarimu bose, bari bafite Masters. Muri bo, 2.265 bari abagabo naho 670 ari abagore.

Abafite PhD bari 1.360, bangana na hafi kimwe cya kane cy’abarimu bose. Abafite Impamyabumenyi y’Icyiciro cya kabiri cya Kaminuza (Bachelor’s Degree) bari 936, barimo abagabo 683 n’abagore 253, naho 232 bari bafite impamyabumenyi iri munsi ya Bachelor’s Degree.

Minisiteri y’Uburezi igaragaza ko ubwiyongere bw’abarimu bafite PhD bwerekana ko hari benshi bakomeje kuzamura urwego rw’amashuri yabo. Icyakora, raporo inagaragaza ko kuba abagore bafite PhD bakiri bake ari ikibazo gisaba ko hashyirwaho imbaraga zo kubafasha gukomeza amasomo kugeza kuri uru rwego.

Abigisha muri kaminuza biyongereyeho 19,3% mu mwaka umwe

Ubwiyongere bw’abafite PhD bwabaye mu gihe umubare rusange w’abigisha muri kaminuza n’amashuri makuru na wo wazamutse.

Abarimu bavuye ku 4.577 mu 2023/2024 bagera ku 5.463 mu 2024/2025, ni ukuvuga ko biyongereyeho 886 cyangwa 19,3%.

Umubare w’abarimu bo muri kaminuza n’amashuri makuru mu Rwanda bafite impamyabumenyi y’ikirenga ya PhD umaze kugera ku 1.360