Umubare w’inzovu zamenyekanye ziba muri Pariki y’Akagera wageze kuri 115 nyuma y’ubushakashatsi bwakozwe hagamijwe kumenya no gukurikirana buri nzovu iri muri iyi pariki.

Ubuyobozi bwa Pariki y’Akagera bwatangaje ko ubushakashatsi buba kabiri mu kwezi bwakozwe bwasize hamenyekanye ko hari inzovu esheshatu ziyongereye ku mibare yari isanzwe izwi, bituma umubare wose w’izi nyamaswa ugera kuri 115.

Muri izi nzovu 115 harimo inzovu z’ingore 65 n’ingabo 50. Iyi mibare igaragaza hafi 80% by’umubare wose w’inzovu zigereranywa kuba ziri muri Pariki y’Akagera.

Ubu bushakashatsi bukorwa mu rwego rwo gukurikirana imiterere y’umubare w’inzovu, kumenya buri imwe ku giti cyayo ndetse no gufasha abashinzwe kubungabunga urusobe rw’ibinyabuzima gufata ibyemezo bishingiye ku makuru afatika.

Pariki y’Akagera ni imwe mu duce tw’ingenzi turinzwe mu Rwanda, ikaba ibamo amoko atandukanye y’inyamaswa zirimo n’inyamabere nini. Iyoborwa ku bufatanye bw’Urwego rw’Igihugu rw’Iterambere (RDB) n’Umuryango mpuzamahanga wita ku kubungabunga pariki, African Parks.

Kumenya neza umubare w’inzovu n’imiterere yazo bifasha mu kurushaho kurinda izi nyamaswa no gutegura uburyo bwo kubungabunga aho ziba kugira ngo zikomeze kugira uruhare mu bukerarugendo no mu kubungabunga ibidukikije mu Rwanda.

Umubare w'inzovu zabaruwe muri Pariki y'Akagera wageze kuri 115