Muri gahunda yo kwegereza abaturage ubuyobozi, Ikigo cy’Igihugu gishinzwe Imiyoborere RGB cyerekanye ko hakirimo imbogamizi kuko za Minisiteri zikigundirira inshingano zimwe na zimwe zakagombye gukorwa n’Uturere, hakanagaragara ibikorwa n’ibigo bitandukanye bisa n’aho bigongana mu mikorere yatwo.
Izo mbogamizi zagaragajwe mu nama yo kwigira hamwe bimwe mu bigomba gushyirwamo ingufu hagamijwe kwihutisha iterambere ry’abaturage yateraniye i Kigali kuri wa 05 Werurwe 2013, ihuje za (…)

Muri gahunda yo kwegereza abaturage ubuyobozi, Ikigo cy’Igihugu gishinzwe Imiyoborere RGB cyerekanye ko hakirimo imbogamizi kuko za Minisiteri zikigundirira inshingano zimwe na zimwe zakagombye gukorwa n’Uturere, hakanagaragara ibikorwa n’ibigo bitandukanye bisa n’aho bigongana mu mikorere yatwo.

Izo mbogamizi zagaragajwe mu nama yo kwigira hamwe bimwe mu bigomba gushyirwamo ingufu hagamijwe kwihutisha iterambere ry’abaturage yateraniye i Kigali kuri wa 05 Werurwe 2013, ihuje za Minisiteri, ba Guverineri, Abayobozi b’Uturere n’ibigo bitandukanye, iyobowe na Minisitiri w’Intebe Dr Pierre Damien Habumuremyi.

Umuyobozi wungirije ushinzwe gahunda yo kwegereza abaturage ubuyobozi mu RGB, Ambasaderi Fatuma Ndangiza, yatangaje ko ibyagezweho mu gutanga serivise nziza, kugabanya ubukene, kubaka ubushobozi mu nzego z’ibanze ari ibyo kwishimirwa, ariko asaba ko kugira ngo umusaruro uziyongere Uturere tugomba kwegurirwa ubushobizi bwo gushyira mu bikorwa gahunda za Leta zikigundirwa na Minisiteri. Ati “Nutinya kurekura umwana ngo ahagarare, ugahora umukigakiga bizamugora guhagarara.”

Minisitiri w’Ubutegetsi bw’Igihugu, Musoni James, yavuze ko Minisiteri zigomba kwibanda ku bijyanye n’igenamigambi naho uturere tugashyira mu bikorwa ibiba byemejwe muri gahunda zinyuranye za Leta.

Nk’uko byagarutsweho muri iyi nama, zimwe mu mbogamizi uturere tugifite zidindiza imikorere yatwo harimo kutarekurirwa amafaranga ava mu nzego nkuru za Leta, cyangwa agakererwa.

Minisitiri w’Intebe, Dr Habumuremyi yavuze ko za Minisiteri n’ibigo bireba bizaterana kuwa Mbere hasuzumwa uburyo amafaranga yose yajya ashyirwa ku Turere, hagasigara hagenzurwa uko akoreshwa.

Mu kwegereza ubuyobozi abaturage, Minisitiri w’Intebe yasabye ko buri Minisiteri igomba kuba mu mwaka w’2017 inshingano zayo zose zaba ziri ku rwego rw’Akarere.