Senateri Mukabalisa Donatille wigeze kuba Perezida w’Inteko Ishinga Amategeko umutwe w’Abadepite, yitabye Imana azize uburwayi, mu Bitaro Byitiriwe Umwami Faisal aho yari amaze igihe arwariye.

Amakuru y’urupfu rwe yamenyekanye mu gitondo cyo kuri uyu wa Kane, ndetse umwe mu Basenateri bakoranaga, yabwiye IGIHE ko yari aherutse kumusura ku bitaro aho yari arwariye.

Mukabalisa yavukiye i Nyamata mu Karere ka Bugesera muri Nyakanga 1960, aba umwarimu wigisha amategeko muri Kaminuza yigenga ya Kigali, ULK.

Yakoreye mu Ishami ry’Umuryango w’Abibumbye rishinzwe ubuzima (OMS), akorera n’ishami ry’uyu muryango rishinzwe iterambere, UNDP, mu gihe cy’imyaka 16.

Mu Ukwakira 2003, Mukabalisa yatorewe kuba Umudepite, aba muri uyu mwanya kugeza mu 2008. Kuva mu 2011 kugeza mu 2013, yabaye Umusenateri.

Mu 2013, yasubiye mu mutwe w’Abadepite, awuyobora kugeza mu 2024, ubwo habaga amatora y’abawugize. Ntabwo yongeye kwiyamamaza kuko yamaze manda ebyiri muri uyu mutwe.

Mukabalisa yari Perezida w’ishyaka riharanira ukwishyira ukizana kwa buri muntu, PL, ryashinzwe tariki ya 14 Nyakanga 1991.

Senateri Mukabalisa Donatille yitabye Imana azize uburwayi