Kizito Mihigo na Ingabire Victoire, bari bafungiye muri Gereza ya Nyarugenge iherereye i Mageragere, kuri uyu wa Gatandatu bafunguwe nyuma y’imbabazi bahawe na Perezida Kagame.

Ku isaha ya saa 9:47, Kizito Mihigo, yakandagije ikirenge cye hanze ya gereza atambaye umwambaro uranga imfungwa n’abagororwa.

Mihigo yari yambaye umupira w’umweru urimo utubara twa Orange, w’Umuryango yashinze ’KMP’ n’ingofero ya Orange na yo y’uyu muryango. Yambaye isaha ku kuboko kw’ibumoso, ishapure mu ijosi n’indi mirimbo ku kuboko kw’iburyo.

Bidatinze Ingabire Victoire nawe yahise asohoka, yambaye ikanzu y’umutuku, ikote ry’icyatsi n’isakoshi mu ntoki. Afite umusatsi w’umwimerere.

Nyuma yo gufungurwa Kizito Mihigo yabwiye itangazamakuru ko yishimiye imbabazi yahawe, yongeraho mu kuburana kwe yaburanye ’atakamba’ yemera ibyaha kuko yari azi neza ko Perezida Kagame ari umunyembabazi.

Ingabire Victoire na we yashimiye Umukuru w’Igihugu kuba amufunguye ku mbabazi ze, avuga ko bigaragaza ko aha agaciro abo badahuje ibitekerezo bya politiki.

Habanje kurekurwa abagabo, hakurikiraho abagore. Kizito ari mu bandi 447 bahawe imbabazi muri Gereza ya Nyarugenge.

Inama y’Abaminisitiri idasanzwe yateranye kuri uyu wa Gatanu iyobowe na Perezida wa Repubulika Paul Kagame, yemeje ifungurwa ry’abagororwa 2140 barimo Kizito Mihigo na Victoire Ingabire Umuhoza.

Ingabire yari yarakatiwe imyaka 15 n’Urukiko rw’Ikirenga mu 2013, naho Mihigo yari yarakatiwe imyaka 10 n’Urukiko Rukuru mu 2015.

Abacungagereza bafungura umuryango wa Gereza ya Nyarugenge iri i Mageragere

Gereza yafunguwe mu masaha y'igitondo

Kizito Mihigo ni we wasohotse bwa mbere muri gereza

Kizito ari mu bagera kuri 447 bari bafungiye muri Gereza ya Nyarugenge bahawe imbabazi na Perezida Kagame

Kizito Mihigo yasohokanye umugambi wo gushinga urwe rugo

Kizito Mihigo yashimiye Perezida Kagame. Ati “Benshi bazi imbaraga ze z’igisirikare ariko yagaragaje iz’umutima”

Umuhanzi Kizito Mihigo yari amaze imyaka ine n’igice afunze

Yasohokanye n'izindi mfungwa n'abagororwa bahawe imbabazi na Perezida Kagame

Itangazamakuru ryari ryabukereye kwakira Kizito Mihigo wafunguwe

Kizito Mihigo asinya ku nyandiko imwemerera gusohoka muri gereza

Umunyapolitiki Ingabire Victoire yasohotse muri Gereza ya Nyarugenge

Ingabire Victoire yashimiye Umukuru w’Igihugu kuba amufunguye ku mbabazi ze

Yarekuwe ari kumwe n'abandi bari n'abategarugori bari bafungiye hamwe

Ingabire Victoire asinya ku nyandiko mbere yo gusohoka muri gereza

Ingabire yari afite akanyamuneza. Aha afite urwandiko rumwemerera gusohoka muri gereza

Ingabire yavuze ko imbabazi yahawe zigaragaza ko Perezida Kagame aha agaciro abo badahuje ibitekerezo bya politiki

Kizito Mihigo yishimiye ko agiye kubonana n’inshuti n’abavandimwe badaherukana

Gereza ya Nyarugenge yubatse mu Murenge wa Mageragere

Kanda hano urebe andi mafoto menshi

Amafoto: Muhizi Serge

Video: Salomo George