Polisi y’u Rwanda ikorera mu Mujyi wa Kigali yataye muri yombi abantu bafashwe bacuruza inzoga zizwi nk’ibyuma, zaciwe mu Rwanda kubera ko zitujuje ubuziranenge kandi zangiza ubuzima.

Abafashwe ni abo mu Mirenge ya Muhima, Rusororo n’ahandi hirya no hino muri Kigali. Barimo abazicururizaga mu ngo zabo n’abari bafite utubari.

Polisi yatangaje ko yafashe aba bacuruzi nyuma y’amakuru yatanzwe n’umuturage ku kabari kitwa Moon Life, gakorera mu Murenge wa Muhima, mu Kagari ka Nyabugogo.

Muri ako kabari, Polisi yasanzemo inzoga z’amoko atandukanye, zirimo amacupa 28 ya Konyagi, 26 ya K-Vant, atatu ya Bazoka, 16 ya Kiwingu, atandatu ya Gilbey’s, atanu ya Bond Seven na 16 ya Indiko Gin.

Polisi yahise ita muri yombi Tuyishime Claire w’imyaka 27, wayoboraga ako kabari. Kuri ubu afungiye kuri Sitasiyo ya Polisi ya Muhima.

Polisi yatangaje kandi ko izo nzoga zafashwe nyuma y’iminsi mike itahuye ububiko bw’inzoga zitemewe bwa Gatete Aimable, mu Mudugudu wa Kabeza, mu Kagari ka Kabuga, mu Murenge wa Rusororo, mu Karere ka Gasabo. Muri ubwo bubiko hafatiwe amakarito 192 y’inzoga zitemewe, zirimo amakarito 35 ya Kiwingu, 39 ya King Vodka, atanu ya Rabiant, 18 ya GS Rum n’izindi.

Izo nzoga zatahuwe ku wa 10 no ku wa 11 Ukwakira, ariko nyirazo yahise atoroka inzego z’umutekano. Ibikorwa byo kumushakisha birakomeje.

Polisi yavuze ko ku wa 4 Ukwakira 2026, mu Mudugudu wa Kalisimbi, mu Kagari ka Kabuga ya Mbere, mu Murenge wa Rusororo, mu Karere ka Gasabo, hanafatiwe umugabo w’imyaka 29 witwa Mbonimpa Idrissa. Uyu mugabo afite iduka ahitwa Mugahoromani, mu Mudugudu wa Kabeza, mu Kagari ka Kabuga, aho yacuruzaga inzoga z’amoko atandukanye zakuwe ku isoko.

Umuvugizi wa Polisi mu Mujyi wa Kigali, CIP Wellars Gahonzire, yavuze ko kuba inzoga z’ibyuma zigifatanwa abacuruzi bigaragaza ko hari izikiri mu baturage. Yabasabye gutanga amakuru no kwirinda kuzinywa kuko zangiza ubuzima.

Minisitiri w’Ubuzima, Dr. Sabin Nsanzimana, aheruka gutangaza ko mbere y’uko gahunda yo guca inzoga zitujuje ubuziranenge zizwi nk’ibyuma itangira, mu Rwanda hari litiro zigera kuri miliyoni 20 z’izi nzoga.

Imibare igaragaza ko mu mezi atandatu ya mbere ya 2026, abantu barenga 500 bari bamaze kugana amavuriro nyuma yo kunywa izo nzoga, naho abarenga 50 bari barapfuye. Dr. Nsanzimana yongeyeho ko abagera hafi ku 100 bahumye burundu, mu gihe abandi bagize ibibazo by’ubwonko, umwijima n’izindi ngingo.

Polisi y'u Rwanda ikorera mu Mujyi wa Kigali yafashe abantu bacuruzaga inzoga z'ibyuma

Polisi iraburira abantu bagikomeje gucuruza inzoga zaciwe ku isoko ry'u Rwanda kubera kwangiza ubuzima bw'abantu

Nyuma yo guta muri yombi abacuruza inzoga z'ibyuma, Polisi yahise ijya kuzimena