IGIHE

Gare ya Rwamagana irimo na internet yatashywe nyuma yo gutwara miliyoni 670 Frw

6 11-02-2019 - saa 20:11, Hakizimana Jean Paul

Gare ya Rwamagana ifite umwihariko wo kugira umuyoboro wa Internet yatashwe ku mugaragaro nyuma y’igihe kinini yubakwa.

Yatashywe kuri uyu wa Mbere tariki 11 Gashyantare 2019, mu birori byitabiriwe n’abayobozi batandukanye barimo n’umunyamabanga wa leta muri minisiteri y’ibikorwa remezo, Uwihanganye Jean de Dieu.

Umushoferi utwara abagenzi ukorera muri aka karere, Rutayisire Emmanuel, yavuze ko imikorere yari igoranye kuko aho bari barimuriye gare hari kure y’umujyi, bikabangamira abagenzi.

Ati “Urabona hariya bari baratwimuriye kugira ngo ugere mu mujyi harimo ibirometero nka bibiri, rero wasangaga abagenzi babyinubira cyane. Ikindi imvura yagwaga ikahabanyagirira ariko ubu turishimye cyane kuba gare nshya yuzuye bakayitugaruramo.”

Rutayisire yakomeje avuga ko bigiye gutuma serivisi batangaga zo gutwara abagenzi zigenda neza kandi abaturage ntibongere guhendwa batega kenshi.

Umuyobozi w’akarere ka Rwamagana Mbonyumuvunyi Radjab yavuze ko iyi gare izafasha aka karere mu migenderanire n’utundi turere.

Ati “Iyi gare dutashye tuyitezeho gufasha abagenzi bakorera ingendo muri Rwamagana n’ibindi bice by’igihugu bakazajya bagenda mu mudendezo kandi bakanabona serivisi nziza muri yo.”

Yakomeje avuga ko banayitezeho kuzamura imigenderanire myiza n’utundi turere ndetse n’ibihugu by’ibituranyi.

Umuyobozi wa Jali Holdings irimo RFTC yafatanyije n’akarere kubaka iyi gare, Twahirwa Dodo, yashimiye ubuyobozi bw’akarere bwabafashije mu kwimura abaturage bari bahatuye kugira ngo babone ubutaka bunini kandi bwisanzuye.

Yanavuze ko umwihariko w’iyi gare ari uko izaba irimo umuyoboro wa internet ku buryo abagenzi bazajya baba bategereje imodoka bazajya bayikoresha.

Umunyamabanga wa leta muri Minisiteri y’ibikorwa remezo ushinzwe gutwara abantu n’ibintu, Uwihanganye Jean de Dieu, yashimiye ubuyobozi bw’akarere na Jali Holdings bafatanyije mu kubaka iyi gare, asaba abaturage kuyifata neza.

At “Abaturage turabasaba kuyifata neza mukayibyaza umusaruro, ntimukemere ko hari uwayihungabanyirizamo umutekano kandi ibikorwa remezo biyirimo mubifate neza.”

Iyi gare iherereye mu mujyi wa Rwamagana rwagati, mu murenge wa Kigabiro. Yubatswe ku bufatanye bw’akarere na Jali Holding.

Yatangiye kubakwa muri Nzeri 2017, ifite parikingi y’imodoka 40, imiryango 20 y’ubucuruzi, aho bakatira amatike ndetse n’aho abagenzi bategerereza imodoka. Huzuye ibyiciro bibiri byatwaye arenga miliyoni 670 Frw nk’uko bitangazwa n’ubuyobozi bw’akarere.

Biteganyijwe ko icyiciro cya gatatu kigizwe n’inzu y’amagorofa abiri cyizubakwa mu mwaka w’ingengo y’imari wa 2019/2020. Nicyuzura, gare yose ikaba izuzura itwaye arenga miliyari 1.3 Frw.

Kwamamaza
Kwamamaza

Izindi nkuru wasoma

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

1
anuba 2019-02-12 11:45:15

kbsa twishimiye gare shya nakanyamuneza kuba nya rwamagana
Rajyabu kuraje kwesa imihigo

2
john 2019-02-12 00:36:55

Mwaramutse mwese,nagira ngo mbabwire ko ari byiza kuba Rwamagana yabonye gare nshya ariko imiterere y’aho bashyize amarembo ya gare ni habi cyane!!!!!!rwose amarembo yayo ari ahantu habi sinzi impamvu batbyitayeho kubireba.Birashoboka cyane ko Imodoka zizajya zikuba ku nkigi za gare rwose.

3
Mbaraga 2019-02-12 00:04:59

Rwamagana irasobanutse rwose.

4
Mayisha 2019-02-11 20:53:29

Reka iki kiba ari icyanzu muciye cyo gusahura frw ya Leta. Kubaka utwumba 20 twa boutiques, no gusiza ikibuga imodoka 40 zihagararamo ukagisasamo paves nibyo bitwara million 600 ?! Uko mukora turabizi. Izi paves se imodoka ya 2 tones yazigendaho kangahe zitarashwanyuka. Harya ngo auditor arakora, akora iki kindi kitari ukutwereka aho banyereje frw, kuki atabikumura batarayiba ?

5
sinzayigaya james 2019-02-11 14:13:13

gale Rwamagana iziye igihe dushyigikiye iterambere ryakarere kacu

6
DEM 2019-02-11 12:38:46

Hoya rwose Rwamagana yikuye mu isoni kabisa yari ikabije kutagira Gare Routiere! Ikindi abanya-Rwamagana bagomba kumenya ni uko mukeba wabo Kayonza ari kubasiga cyane kabisa hamwe bakeneye kwinyara mu isunzu bakubura umutwe kabisa bakigaragaza kubera ishyari ryiza muri rusange. Ngaho rero bazubake n’Akarere gashya maze turebe batavumbye Intara maze turebe. Nixzere ko iki gikorwa kizongera amanota yabo mu mihigo.

Kwamamaza