BPR Bank Rwanda PLC, ibinyujije muri BPR Foundation, yatangije ku mugaragaro BPR Scholars, gahunda y’Uburezi izafasha abanyeshuri 50 bafite amanota meza baturuka mu miryango itishoboye kubona amahirwe yo kwiga no kurangiza amashuri yisumbuye.

Iyi gahunda iri gushyirwa mu bikorwa ku bufatanye na Minisiteri y’Uburezi (MINEDUC), izafasha abahungu 25 n’abakobwa 25 bazatoranywa mu Turere dutandukanye tw’u Rwanda.

BPR izafasha aba banyeshuri gukomeza amashuri kuva mu mwaka wa mbere w’amashuri yisumbuye (S1) kugeza barangije uwa gatandatu (S6), ibaha ibikenerwa by’ibanze bibafasha gukurikirana amasomo no kurangiza amashuri yabo neza.

Ubuyobozi bwa BPR Bank Rwanda PLC, bwavuze ko iyi gahunda igamije gukuraho imbogamizi zishingiye ku bukene n’imibereho ishobora kubangamira abanyeshuri kubona amashuri, kuyakomeza no kuyarangiza.

Uretse ubufasha bw’ibikoresho n’ibindi bikenerwa mu ishuri, aba banyeshuri bazahabwa n’ubujyanama buzabafasha mu myigire no mu buzima rusange, kubongerera icyizere, kubigisha ubumenyi ngiro no kubafasha gufata imyanzuro myiza ku hazaza habo.

Umuyobozi ushinzwe Imari muri BPR Bank Rwanda Plc, Ngirikiringo Vincent, yavuze ko buri mwana akwiye guhabwa amahirwe yo kugera ku nzozi ze hatitawe ku mibereho akomokamo.

Yagize ati "Muri BPR Bank twizera ko buri mwana akwiye guhabwa amahirwe yo kugera ku nzozi ze, hatitawe ku muryango yaba akomokamo. Binyuze muri gahunda ya BPR Scholars, twiyemeje gufatanya n’aba banyeshuri mu rugendo rwabo rwo gukomeza amashuri yisumbuye kuva muri S1 kugeza muri S6. Turashaka gukuraho imbogamizi z’amikoro no kubaha ubufasha n’ubujyanama bakeneye kugira ngo bagere ku ntsinzi."

Yakomeje avuga ko intego atari ugutanga inkunga y’amafaranga gusa, ahubwo ari uguherekeza aba banyeshuri mu rugendo rwabo rw’imyaka itandatu, bakabafasha gutegura intego z’ubuzima, kwiteza imbere no kumenya amahirwe y’uburezi n’umwuga bibategereje.

Umukozi muri Minisiteri y’Uburezi, Niyongabo Eric, yashimiye ubufatanye na BPR Bank Rwanda PLC mu gushyigikira gahunda z’igihugu zo guteza imbere uburezi, agaragaza ko gahunda nk’iyi ifasha gukuraho inzitizi zibangamira abanyeshuri.

Ati “Imibare iheruka twabonye ko abanyeshuri batsinda amashuri abanza nibura 79% ari bwo bajya mu mashuri yishumbuye kandi icyo twifuza ni uko byaba 100%. Iyo rero habonetse ubufatanye n’ibigo nka BPR bidufasha kurushaho kongera umubare cyane ko ahanini impamvu zigaragara ari uko haba habuze ubushobozi.

Umwe mu bana watsinze amashuri abanza witwa Shema Patrick uri mu bahawe amahirwe yo kuzishyurirwa na BPR, yavuze ko ashimira iyi Banki kuba yaramuhisemo nk’uzishyurirwa, agaragaza ko atazayitenguha mu myigire ye.

Ku rundi ruhande, Mukeshimana Vestine umubyeyi wa Shema yavuze ko agihamagarwa akabwirwa ko bahisemo umwana we nk’uzishyurirwa yagize ngo ni abatekamutwe ndetse yanga kubyemera ariko nyuma abyemezwa n’uko yongeye guhamagarwa kuri iyi Banki. Ashimira BPR cyane kubw’ubufasha bageneye umwana we kuko aribyo bari bimuhangayikishije.

BPR Bank Rwanda yavuze ko itangizwa ry’iyi gahunda ari intangiriro y’urugendo rw’imyaka itandatu ndetse bakazakomeza gukurikirana aba banyeshuri kugeza barangije amashuri yisumbuye, hagamijwe gukomeza kubaremamo icyizere, ubushobozi n’uruhare rufatika mu iterambere ry’imiryango yabo n’iry’u Rwanda muri rusange.

Binyuze muri BPR Bank Foundation, iyi banki ishora imari mu bikorwa byibanda ku burezi no guteza imbere imishinga mito hagamijwe gufasha abaturage no kubafungurira amahirwe y’iterambere rirambye mu mibereho no mu bukungu.

BPR Bank PLC binyuze muri BPR Foundation izafasha abanyeshuri 50 batsinze amashuri abanza kugeza basoje ayisumbuye

Umubyeyi wa Shema yavuze ko yagize ngo ni abatekamutwe gusa nyuma asanga ari ukuri, ashima BPR yahisemo umwana we

Umukozi muri Minisiteri y’Uburezi, Niyongabo Eric, yashimiye ubufatanye na BPR Bank Rwanda mu gushyigikira gahunda z'igihugu zo guteza imbere Uburezi, yashimye ubu bufatanye

Umuyobozi ushinzwe Imari muri BPR Bank Rwanda Plc, Ngirikiringo Vincent, yavuze ko buri mwana akwiye guhabwa amahirwe yo kugera ku nzozi ze hatitawe

BPR Bank PLC yatangije gahunda ya BPR Scholars igamije guha abanyeshuri amahirwe yo kurangiza amashuri yisumbuye