Perezida wa Repubulika Iharanira Demokarasi ya Congo (RDC), Félix Tshisekedi, ntazitabira Inteko Rusange ya 81 y’Umuryango w’Abibumbye i New York muri Leta Zunze Ubumwe za Amerika, aho igihugu cye kizahagararirwa n’intumwa ziyobowe na Minisitiri w’Intebe, Judith Suminwa.

Amakuru yatangajwe ku Cyumweru tariki ya 20 Nzeri 2026 na Guverinoma ya RDC, yavuze ko Perezida Tshisekedi atazitabira iyo nama, ariko ntiyatangaza impamvu y’icyo cyemezo.

Gusa amakuru yatangajwe na RFI avuga ko hari inzego n’abantu batandukanye babwiye iki gitangazamakuru ko kutajya kwa Tshisekedi muri Amerika bifitanye isano n’ingamba zashyizweho na Washington kubera ikibazo cy’icyorezo cya Ebola muri RDC.

Kuva RDC yatangaza ko Ebola yongeye kugaragara mu ntara zimwe zo mu burasirazuba bw’igihugu, Leta Zunze Ubumwe za Amerika zashyizeho amabwiriza mashya agenga ingendo z’abantu baturuka muri RDC, Uganda na Sudani y’Epfo.

Ayo mabwiriza ateganya ko abagenzi baturuka muri ibyo bihugu batemerewe kwinjira muri Amerika batabanje kumara iminsi 21 mu kato mu kindi gihugu. DRC.

Nubwo hari ubusonerwe ku bayobozi bakuru b’ibihugu na za guverinoma, ku buryo Minisitiri w’Intebe Judith Suminwa yashoboye kujya i New York, umubare munini w’abantu bagize itsinda riherekeza Perezida Tshisekedi, cyane cyane abashinzwe umutekano we, ngo wari gutuma ubwo busonerwe budakurikizwa kuri Perezida.

Amakuru akomeza avuga ko no kugabanya umubare w’abashinzwe umutekano wa Perezida bitari bihagije kugira ngo urugendo rwe rushobore gukorwa hakurikijwe ayo mabwiriza. Ibi ni na byo byari mu mpamvu zatumye Tshisekedi ahagarika urugendo yari ateganyije kujya muri Amerika muri Nyakanga 2026.

Muri iyi nama ya UN, RDC izahagararirwa na Minisitiri w’Intebe Judith Suminwa ndetse na Minisitiri w’Ububanyi n’Amahanga, Thérèse Wagner.

Tshisekedi ntabwo azitabira Inteko Rusange ya Loni