Ikigo cyo mu Misiri cyitwa Minapharm cyatangiye gukora urukingo rushya rugenewe kurwanya ubwoko bwa Ebola bwa Bundibugyo bwibasiye Repubulika Iharanira Demokarasi ya Congo (RDC).

Mu gihe RDC ikomeje guhangana n’icyorezo cya Ebola, ubushakashatsi ku rukingo rwihariye rwo kurwanya virusi ya Bundibugyo bukomeje kwihutishwa.

Ihuriro rishinzwe guteza imbere udushya mu bijyanye no kwitegura guhangana n’ibyorezo (CEPI) ryemeye gutanga inkunga igera kuri miliyoni 16.5 z’amadolari ya Amerika kugira ngo ikigo cyo mu Misiri cya Minapharm gikomeze guteza imbere uru rukingo kugeza rugeragejwe bwa mbere ku bantu muri Afurika.

Uru rukingo rwakozwe n’ikigo ProBioGen gikorera i Berlin mu Budage, kikaba ari kimwe mu bigize itsinda rya Minapharm.

Minapharm yatangaje ko yatangiye gukora uru rukingo rugamije kurwanya ubwoko bwa Ebola buri gukwirakwira muri RDC.

Uyu mushinga ubaye uwa gatanu ushyigikiwe na CEPI mu rwego rwo gukora urukingo rwihariye rwa Ebola ya Bundibugyo. Izindi gahunda zashyigikiwe na CEPI zikoresha ikoranabuhanga ritandukanye, harimo urukingo rwa Moderna rukoresha ARN messager, ChAdOx rwakozwe na Kaminuza ya Oxford n’Ikigo cya Serum Institute of India, ndetse n’ikoranabuhanga rya rVSV rikoreshwa n’ibindi bigo by’ubushakashatsi.

Nubwo iyi gahunda itanga icyizere, uru rukingo ntirurakoreshwa mu guhangana n’icyorezo kiriho muri RDC, kuko ruracyari mu bushakashatsi. Kugeza ubu nta rukingo cyangwa umuti wihariye byemejwe mu kurwanya ubwoko bwa Ebola bwa Bundibugyo.

Uru rukingo rukoresha uburyo bwo gukora virusi yahinduwe ku buryo idashobora kwiyongera mu turemangingo tw’umuntu, ariko igafasha ubudahangarwa bw’umubiri kumenya no kurwanya ibice bya virusi ya Bundibugyo.

Mbere yo kugeragezwa ku bantu, uru rukingo rugomba kubanza kunyura mu bushakashatsi bwo muri laboratwari. Nyuma ruzatangira icyiciro cya mbere cy’igeragezwa ku bantu, hagamijwe kureba umutekano warwo n’ubushobozi bwo gutuma umubiri ukora ubwirinzi kuri Ebola.

Gukora uru rukingo bizajya bikorerwa hagati ya Berlin mu Budage na Cairo mu Misiri. ProBioGen izabanza gukora igice cy’ibanze cy’urukingo, nyuma Minapharm ikore igicuruzwa cya nyuma mu Misiri. Iki kigo gifite na gahunda yo kwimurira ibikorwa byose byo gukora urukingo i Cairo mu gihe kiri imbere.

Umuyobozi wa Africa CDC, Jean Kaseya, yavuze ko kuba uru rukingo ruri gutezwa imbere n’ikigo cyo muri Afurika ari intambwe ishobora gufasha uyu mugabane kongera ubushobozi bwo gukora ibikoresho byawo byo kurwanya ibyorezo.

Mu gihe hagitegerejwe urukingo rwihariye rwa Bundibugyo, Ishami ry’Umuryango w’Abibumbye ryita ku Buzima (OMS) ryasabye ko hakorwa igeragezwa ry’urukingo rwa Ervebo, rwemejwe mu kurwanya ubwoko bwa Ebola bwa Zaïre. Nubwo ubushobozi bwarwo bwo kurinda abantu Ebola ya Bundibugyo butaragaragazwa, ubushakashatsi bwakorewe muri laboratwari no ku nyamaswa bwerekanye ko rushobora kugira uburinzi runaka.

Kuva hagati muri Gicurasi ubwo icyorezo cya 17 cya Ebola cyatangiraga muri RDC, habaruwe abantu 5.945 banduye mu ntara esheshatu. Muri bo, 2.862 barapfuye mu gihe 1.327 bakize, nk’uko imibare yatangajwe n’Ikigo cy’Igihugu cy’Ubuzima rusange cya RDC ibigaragaza.

Iki gipimo cy’impfu cya 48,1% cyatumye iki cyorezo gikomeza kuba ikibazo gikomeye cy’ubuzima rusange muri RDC.

Misiri iri gukora urukingo rwa Ebola yugarije RDC