Umugaba Mukuru w’Ingabo za Ethiopia, Field Marshal Birhanu Jula, yashinje Eritrea na Sudani gushyigikira imitwe yitwaje intwaro ihanganye n’ingabo za Leta mu majyaruguru y’igihugu, mu gihe imirwano hagati y’izo ngabo n’umutwe wa Tigray People’s Liberation Front (TPLF) ikomeje gukaza umurego.

Mu kiganiro cyanyujijwe ku muyoboro wa YouTube w’igisirikare cya Ethiopia ku Cyumweru, tariki ya 27 Nzeri 2026, Birhanu yavuze ko ingabo ze zihanganye n’imitwe ifitanye ubufatanye bugamije gukorera inyungu z’ibihugu by’amahanga. Yavuze ko TPLF na Eritrea bidashobora kugera ku ntego zabyo bidafashijwe na Sudani, Misiri n’abandi bo hanze.

Imirwano ikomeye hagati ya TPLF n’ingabo za Leta yongeye kubura ku wa Gatatu tariki 23 Nzeri 2026. TPLF ivuga ko iri mu “ntambara yo kwirwanaho” ihanganyemo na Guverinoma ya Minisitiri w’Intebe Abiy Ahmed. Uyu mutwe wafashe ibibuga by’indege, unagaba ibitero mu ntara za Afar na Amhara zituranye na Tigray.

Umuntu ukora mu bikorwa by’ubutabazi yabwiye AFP ko ku Cyumweru abarwanyi ba TPLF bafashe umujyi wa Erebti, mu ntara ya Afar hafi y’umupaka wa Tigray, nyuma y’uko urashwemo ibisasu biremereye. Yavuze ko bakomeje berekeza i Afdeera, mu bilometero hafi 100 mu burasirazuba bwa Erebti.

Uwo muntu yagereranyije ko nibura abantu ibihumbi 150 bamaze kuva mu byabo muri Afar, ariko avuga ko bigoye kumenya umubare nyawo.

Ku Cyumweru kandi, ibiro bya televiziyo ya Tigrai TV, ikorera mu murwa mukuru wa Tigray, Mekelle, byagabweho igitero cya drone. Umunyamakuru ukorera kuri iyo televiziyo yavuze ko abari mu nyubako bahunze bumvise iturika.

Amafoto yafashwe n’umunyamakuru wo muri ako gace yagaragaje ko igice cy’imbere cy’inyubako cyangiritse, amadirishya menshi akameneka. Nta makuru yari yahise atangazwa ku baba bakomerekeye muri icyo gitero.

Itumanaho rya telefone na internet muri Tigray ryagize ibibazo bikomeye kuva ku wa Gatanu, bituma kubona amakuru yizewe ku mirwano bigorana. Abaturage bamwe bafite impungenge ko hashobora kongera kubaho ibihe byo kubura amashanyarazi, serivisi za banki n’imfashanyo nk’ibyabaye mu ntambara yo mu 2020–2022.

Umunyamabanga Mukuru w’Umuryango w’Abibumbye, António Guterres, yagaragaje impungenge ku makuru avuga ko muri iyo mirwano hakoreshwa drone kandi abasivili bakaba bagirwaho ingaruka.

TPLF n’Ingabo za Ethiopia zarwanye intambara hagati ya 2020 na 2022, bivugwa ko yaguyemo abantu bagera ku bihumbi 600.

Amasezerano y’amahoro yasinyiwe i Pretoria mu 2022 yafashije guhagarika imirwano, ariko ntiyashyizwe mu bikorwa mu buryo bwuzuye. Abantu bagera kuri miliyoni imwe ntibarasubira mu byabo.

Abarwanyi bo muri Tigray bongeye kubura imirwano