Eritrea yasabye Akanama k’Umuryango w’Abibumbye gashinzwe Umutekano gufatira Ethiopia ingamba zo kuyikumira, ivuga ko ibirego by’uko ingabo zayo zateye icyo gihugu ari uburyo bwo kuyitangizaho intambara.

Ibi bikubiye mu ibaruwa Minisitiri w’Ububanyi n’Amahanga wa Eritrea, Osman Saleh, yanditse ku wa 10 Ukwakira 2026.

Ethiopia ishinja ingabo za Eritrea kwinjira ku butaka bwayo, ariko Eritrea irabihakana. Reuters yatangaje ko itashoboye kugenzura ayo makuru yigenga. Ibi birego byongereye impungenge z’uko ibyo bihugu byongera kwinjira mu ntambara ikomeye.

Saleh yavuze ko ibirego byo kwinjira muri Ethiopia biri muri gahunda y’icyo gihugu yo gushaka impamvu yo gushoza intambara kuri Eritrea.

Ati “Eritrea irasaba Akanama ka Loni gashinzwe Umutekano kwamagana yivuye inyuma igikorwa giteye agahinda cya Ethiopia cyo gutangaza intambara kuri Eritrea […] no kuyifatira ingamba zikenewe zo kuyikumira, hakurikijwe Umutwe wa VII w’Amasezerano ya Loni.”

Uwo mutwe uteganya ingamba zirimo ibihano no gukoresha ingufu za gisirikare. Saleh ntiyasobanuye izo Eritrea yifuza.

Ku wa Gatanu, Ethiopia na yo yandikiye abagize ako kanama, ivuga ko ingabo za Eritrea zari zimaze iminsi zinjiye muri Tigray, zikagera ku bilometero 60 imbere mu gihugu. Yavuze ko kuba hari ingabo z’amahanga ku butaka bwayo biyiha ububasha bwo kwirwanaho.

Abaturage batatu babwiye Reuters ko ku wa Gatandatu ingabo za Ethiopia n’umutwe uzishyigikiye zinjiye mu Mujyi wa Adigrat, uri ku bilometero 30 uvuye ku mupaka wa Eritrea.

Amashusho Reuters yagenzuye yagaragazaga abarwanyi bashyigikiye Leta ya Ethiopia bagenda mu mihanda y’uwo mujyi.

Urwego rukurikirana amakimbirane, ACLED, rwatangaje ko Ethiopia yakoresheje indege zitagira abapilote mu kugaba ibitero ku ngabo za Eritrea, nyuma zikava mu birindiro hafi ya Adigrat. Abaturage bavuze ko humvikanye ibiturika kuva ku wa Gatatu kugeza ku wa Gatanu.

Minisitiri w’Itangazamakuru wa Eritrea, Yemane Gebremeskel, yavuze ko igihugu cye cyakomeje kwifata. Yagaragaje ko icyifuzo Ethiopia yatangaje mu 2023 cyo kugira inzira yayo igera ku nyanja ari ukuyitangazaho intambara.

Ethiopia ivuga ko kugera ku nyanja ari ingenzi ku mibereho yayo, ariko ko izabigeraho binyuze mu mahoro n’ibiganiro.

Ethiopia ishinja kandi Eritrea gushyigikira ihuriro ry’inyeshyamba rirwana n’ingabo za Leta muri Tigray, Amhara na Afar kuva tariki 23 Nzeri. Eritrea irabihakana.

Ibyo bihugu byasinye amasezerano y’amahoro mu 2018, yatumye Abiy Ahmed ahabwa igihembo cy’amahoro cyitiriwe Nobel. Eritrea yanashyigikiye Ethiopia mu ntambara ya Tigray yo mu 2020–2022, ariko umubano wongeye kuzamba iyo ntambara yenda kurangira.