Abakozi bashinzwe kwakira no gufasha abagenzi mu ndege za sosiyete y’indege yo muri Canada, WestJet, batangiye imyigaragambyo yo guhagarika akazi kubera kutumvikana n’ubuyobozi ku bijyanye n’imishahara, bituma iyi sosiyete ihagarika ingendo zisaga 300.

Iyi myigaragambyo yatangiye kuri iki Cyumweru, ikaba yaratangajwe n’ihuriro ry’abakora mu by’indege muri Canada (CUPE) ribarizwamo abakozi bagera kuri 4.400 bakora mu ndege za WestJet.

Ubuyobozi bwa WestJet bwemeje ko imyigaragambyo yatangiye ndetse buvuga ko yahagaritse ingendo zirenga 300, ibintu byahungabanyije gahunda z’ingendo muri Canada.

Impaka nyamukuru hagati y’impande zombi zishingiye ku buryo abakozi bashinzwe kwakira abagenzi mu ndege bagomba guhembwa ku kazi bakora igihe indege itarahaguruka cyangwa imaze kugwa.

Iri huriro ry’abakora mu ndeg ryavuze ko hari ibikorwa bikorwa n’abakozi bari ku butaka bitishyurwa uko bikwiye, kuko abakozi babarirwa umushahara hagendewe gusa ku masaha bamaze mu kirere.

Umuyobozi Mukuru wa WestJet Group, Alexis von Hoensbroech, yavuze ko sosiyete yari yatanze icyifuzo cyari gutuma abakozi bayo bagira uburyo bushya bwo guhembwa.

Abagenzi bagizweho ingaruka n’ihagarikwa ry’ingendo basabwe guhabwa amafaranga yabo cyangwa bagahabwa ubundi buryo bwo kugenda.

Sosiyete yavuze ko izamenyesha abagenzi bari barakatishije amatike binyuze kuri yo, mu gihe abaguze amatike bakoresheje ibigo by’ubukerarugendo cyangwa izindi serivisi z’abahuza basabwe kubimenyesha abo bakoresheje.

Iyi myigaragambyo ibaye nyuma y’umwaka umwe gusa abakozi bashinzwe kwakira abagenzi muri Air Canada, sosiyete nini y’indege muri Canada, na bo bakoze imyigaragambyo ikagira ingaruka ku bagenzi basaga 100.000.

Iyo myigaragambyo na yo yari ishingiye ku kibazo cy’imishahara y’igihe abakozi bamara bakora imirimo Indege iri ku butaka, mbere cyangwa nyuma y’ingendo. Yamaze iminsi itatu mbere y’uko impande zombi zigera ku masezerano.

Nubwo imyigaragambyo yatangiye, WestJet n’abahagarariye abakozi bavuze ko biteguye gusubira ku meza y’ibiganiro kugira ngo bashake umuti w’ikibazo.

WestJet yasubitse ingendo 300 kubera imyigaragambyo y'abakozi